قصائد دايم السيف الامير خالد الفيصل ( مميزة )

[ابن نجد]

من منا لايعشق قصائد دايم السيف الامير خالد الفيصل ، الحروف ذليله تحت يديه عندما يعجز الاخرين عن تذليل الحروف ، اهدي لكم بعض اشعاره، أبدعها عندما احتل طاغية العراق دولة الكويت الشقيقه:

(حب الخشوم)

ماينسينا الخطا حب الخشوم
ولايطهرك المطر عشرين عام

مخطي ترضا لنا ظلم الظلوم
مخطي ترضى على شعبك يضام

بايع شاري على شعبك تسوم
مايهمك بالحلال والحــرام

لاجل شعبك بيننا كنت محشوم
لكن الحشمه خساره باللئام

يوم فشلنا صواريخ الخصوم
رحت ياوجه الفلس ترمي كلام

من شمال وجنوب امسيتو قوم
وانت تنتخي كل مجرم بالظلام

وتفقتوا اخذكم الله يالرخوم
تطعنون الجار وظهور الكرام

لا حيا فيكم ولانفس تشوم
غركم فينا محبتنا السلام

كل غدار تجهز للهجـوم
من طمعكم ماحسبتم للملام

المعارك ماخذت ليله ويـوم
سلموا جند الخطا ما بالحزام

وعود الغازي من الغزو مهزوم
وامست دياره من افعاله هدام

وطاحت قصور التماني والحلوم
واكتفيتوا في طلب ظل الخيام

نحمدالله شيخنا راعي عزوم
والعظايم مالها غير العظام

قام واللي يطلب العليا يقوم
ماينوم اللي بغى غيره ينام

انتهض مثل العقاب اللي يحوم
لين جات صقورهم مثل الحمام

شيخنا قرم تحدر من قروم
الملك ابن الملك ابن الامام
========================================
( يزحف الموت )

قام يرغي عقب هاك الهدير
كافر الدين كذاب العرب

لاذ خلف الرهاين يستجير
يوم ثارت عواصيف الغضب

يزحف الموت واللحظة تسير
موعد عصابة الغدر اقترب

كل خاين ترى حبله قصير
دام للحق طلاب وطلـب

لاتعدى حدودك يا غرير
سيفنا صلب وسيوفك خشب

ما لكسر كسرنا بك جبير
من هوى سيفنا فوقه عطب

ياصغير تشبث في صغير
الذنب كيف يتبع له ذنب

مابقى لك على الباطل نصير
شف تبيعك تنكر وانقلب

من فهد جاك ياجابر بشير
قاد لك مجلس الامن وحرب

وارسلوا يم صدام النذير
طاع والا غصبناه انسحب
================================================== ==
( حنا العرب )
حنا العرب يامدعين العروبه
وحنا هل التوحيد وانتم به اجناب

وحنا شروق المجد وانتم غروبه
وحنا هل التاريخ وانتم به اغراب

يوم الفقر شلتوا علينا عيوبه
واليوم عقب النفط جيتوا لنا انساب

يوم الفقر شفتوا البداوه سبوبه
واليوم صرتوا مثلنا بدو واعراب

لو الهوى منكم منعتوا هبوبه
لاشك رزاق الملا رب الارباب

ولو المطر منكم منعتوا صبوبه
لاشك رزق الخلق من عند وهاب

جيش الحسد سقتوا علينا حروبه
كلا يبي يزرع على جسمنا ناب

حرب على المحسن تراها عقوبه
يالله عساكم ماتفيدون حراب

ياما عطينا ماندور مثوبه
إلا من اللي من ترجاه ماخاب

وياما نصرنا صاحب ضيقوا به
عاداتنا نقدم إليا مردي هاب

وياما نصانا من تعثر دروبه
يدخل حمانا من تعذره الاصحاب

حنا بنينا دارنا من طيوبه
وانتم سلبتوا داركم كل ماطاب

الله سقانا من بحرنا عذوبه
وانهاركم مثل البحر هدر تنساب

وحنا زرعنا الحب بارض خصوبه
وانتم زرعتم كره الاجيال بتراب

وحنا دعينا السلم نوبه ونوبه
وانتم حمام السلم بعتوه بغراب

يا من دعى للحرب مدرك خطوبه
لاتحسبن الحرب تهديد وخطاب

من شب نار الحرب يصلى شبوبه
ومن ثور الفتنه تعرض للاسباب

ومايستر الرجال ملبوس ثوبه
الدين وافعال الكرامه له ثياب

ومايقبل الرجال بحماه حوبه
مادام له حق وللحق طلاب

نرجو ان تحوز قصائد الامير خالد الفيصل على رضاكم وبإنتظار ردودكم ومشاركاتكم.
--------------------------------------------------------------
زماننا غير زمانهم وحتى نتذكر الاولين
اخوكم ابن نجد