بالهون يا عذال قلبي ولايمه = دع القلب بفوادي يصالي هضايمه
اسهر وعيني ما يهملج نظيرها = وقلبك خليّ الهم والعين نايمه
ليا صار قلبك بارد الهم غافل = فأنا ترى قلبي يزايم عظايمه
يجر وناتٍ تضايق بها الحشى = أيضا و لي روحٍ بالأفلاك حايمه
ان هاجت افكاري عليّ وتزايدت = تصوّر بعيني ساعة الحشر قايمه
تلاطم هموم القلب بالصدر كنها = ملاطم الامواج بالبحر عايمه
همٍّ يفارقني وهمٍّ يزورني = وهمٍّ يزايمني وهمٍّ ازايمه
أسلّي فؤادي بالهموم وغايتي = إلى مرقبٍ قلبي يحبّه و رايمه
منيع الذرى يبعدك عن ساقط الملا = ليا صار لك نفسٍ عن الذل شايمه
الذل يوريك الهوان وتنتمي = إلى أمة في مرتع الذل هايمه
خاطر بدرب المجد يا طالب العلا = ترى خالق الدنيا كبارٍ غنايمه
اللي يريد المجد يشريه لو غلي = وحليف المذله من تردت عزايمه
اختر طريق العز لو به منيتك = واعرف ترى دنياك ماهيب دايمه
وحليف المذله لا تطاوع مشورته = وإلى بغى لاماك حذرى تلايمه
وترى الفتى بالعزم يدرك مرامه = يخيف عدوانه وتقوى شكايمه
أتبع طريق العدل والطيب والنقى = وافطن لحظك لا تبيعه لسايمه
ليا جاك مذمومٍ من الناس مجرم = خلك بعيدٍ لا تنوشك جرايمه
ورفيقك المخلص تحمّل مصيبته = اذكر فعول الطيب واذكر قدايمه
لا تتركه لاعداك واعداه وحده = ليا تركته يلحقنك لوايمه
ليا صابه الخطب العظيم تذكرك = تزيح عنه الكرب لا صار ضايمه
وليا التجا بك واحدٍ ضده النيا = عانيك لا ترضى عليه بهزايمه
وبعدك عن الانذال فيه المعزة = في مهمهٍ صيد المها في خرايمه
لو انت بالقيض الشديد وحرّه = يلفحك من حر الهواجي سمايمه
اخير من قربك لئيمٍ وحاسد = ورزقك على ربٍ له الخلق صايمه
الأمير/ محمد الاحمد السديري (رحمه الله)
« آخـــر الـــمـــشـــاركــــات »
24-Aug-2005, 11:37 PM
تصوّر بعيني ساعة الحشر قايمه
العرض العادي
