سعود العصيمي=
ياصباح الخير ياربعٍ تضدون المغيره = فعلكم يحمى الجهام وضيفكم يلقى الكرامه
وانت يامقعد صحيبي ماعلى مثلك كسيره = قوم شب النار وصحيبك رصاصه في حزامه
مقعد الدغيلبي=
ياصباح النور ياهل العرف وسيوفٍ شطيره=من بغـا منـا سلامـه لايـدور للسلامـه
الفشق داخل حزامه والحمل يبرك بعيـره=ان بغيتو وسط نجد ولن بغتوا في تهامـه
سعود العصيمي=
احسب حساب الصغيره واحسب حساب الكبيره=لاتلد النـاس فيـك ويصحـي اللـي منامـه
الرعد تسمـع رزيمـه والليالـي مستديـره=والخبر من فوق راسـك فالعقـال وفالعمامـه
مقعد الدغيلبي=
يالعصيمي ماغدالي فالبحر حبـة شعيـره=وا لنظامي ويش رايك لو تلخبط في نظامه
اطمسوها فالمجلـه واعلنوهـا فالجزيره=والبعير ليا حداه الوقت يشرب من سنامه
سعود العصيمي=
قصر الخطوه شوي وخل الك بصر وبصيره=غلطة الشاطر تنقص من علاماته علامـه
والله انا ماوردنـا العـد بحبـالٍ قصيـره=والبعير شعيل حمله فالزمن كسـر عظامـه
مقعد الدغيلبي=
انت ياللي سمعتك في كل دار وكل ديره=تكره النور المبين وتجتلد داخل ظلامه
الرحى قدام عينك يالعصيمي مستديره=خلها يالين يصحي كل نايم من منامـه
سعود العصيمي=
والله إنّا مانصاحب للكلـى والا العميـره=كل راسٍ ياعميلي حاجمينـه بالحجامـه
لاتسرق من حلالي فالصباح وفالظهيـره=كل علمٍ ياصلك من صاحبك عطه اهتمامه
مقعد الدغيلبي=
الزمن دوار والغايـب مانعلـم وش مصيـره=وش طعام اشعيل تال الوقت قلي وش طعامـه
انت مثل اللي على دربه جلس يسحب حضيره=العصمـي ياعتابـه قـوم الدنـيـا قيـامـه
سعود العصيمي=
مالك الا يالعتيبي سل سيفك من جفيره = اسبح البحر الاحمر لو البحر تسعين قامه
التماس السلك يحرق كل سلكٍ بالضفيره = كان تبغون السعاده كل رجل يقوم زامه
« آخـــر الـــمـــشـــاركــــات »
10-Jul-2008, 01:30 AM
العرض العادي
