رساله لأبناء مطير وعتيبه

[فارس المطيري]

السلام عليكم ورحمة الله وبركاته
اخواني اولآ استأذنكم بأن اكتب با اللهجه العاميه لسبب بسيط علشان اقدر اعبر عن الي بداخلي
اخواني
كلنا نشوف الي قاعد يصير بين بعض ابناء قبيلة مطير وعتيبه في المنتديات و وسائل الاعلام خاصه القنوات الفضائيه مثل قنوات الاغاني الماجنه وحتى فنوات الشعر
من جد شي يضيق الصدر ويحز في النفس لكن الغريب ايش ؟؟
الغريب ان مطير وعتيبه انا اعتبرهم اقرب قبيلتين لبعض من جميع النواحي اعتقد سلمهم واحد وعوايدهم وتقاليدهم وحده وحتى لهجتهم والي اعظم من هذا كله صلة القرابه الي تربط بين هالقبيلتين يعني عتبان كثير خوالهم مطران والعكس صحيح ويقال لهم عيال الخاله
وعلشان اكون صريح اكثر ومع احترامي لكل القبايل بين مطير وعتيبه حميه يعني على سبيل المثال العتيبي اذا راح دائره حكوميه اكيد اذا احتاج واسطه بينشد عن بني عمه لكن اذا مالقى عتيبي في الدائره ؟؟ انا متأكد بينشد عن مطيري والعكس صحيح
طيب مع هذا كله ومع هاذي الروابط القويه الي تربط بينهم ليش يتناحون في كل مكان ؟؟
انا من وجهة نظري اعتقد الي بينهم مجرد منافسه على كل المستويات ومن ضمنها الشعر لكن من الي خلى هالمنافسه تتعدى حدودها وتصير اساءه للقبيلتين ؟؟
انا اعتقد الاعلااااااام وخاصه برنامج شاعر المليون الي استغل هالتنافس شر استغلال
اخواني مره كنت اتابع قناة فواصل لقيتهم حاطين صورة تركي 2000 ويوسف العصيمي وطبعآ كل واحد له رقم ويبون المطران والعتبان يصوتون والي يفوز تكون الليله كلها له يعني تعرض قصائد الفايز منهم
الي صار ان سفهاء مطير وعتيبه قامو يتلاعنون على شات القناه ويصوتون ويسبون بعض للأسف ومن المستفيد ؟؟ اكيد قناة فواصل وبالملايين
طيب السؤال قناة فواصل ليش ماختارت شعار غير تركي ويوسف ؟
طبعآ الجواب بسيط لأنهم يعرفون التنافس الي بين مطير وعتيبه والي استغل من قبل الحاقدين والمسترزقه
طيب وش معنى مطير وعتيبه الي بينهم تعصب وقبليه وتنافس ؟؟
ليش مايكون بين شمر وعنزه مثلآ ؟؟ ( مع اني ما اتمنى هالشي )
اعتقد لأن شمر وعنزه مافيهم سفيه ( مع احترامي لمطير وعتيبه )
شعر المحاوره بعد سبب رئيسي
انا عندي امنيه واتمنى تتحقق
اتمنى شيوخ مطير يتبنون حفل يقام مثلآ في الصمان برعاية الشيخ فيصل ابن بندر الدويش ويدعى للحفل شيوخ عتيبه ومن يستطيع الحضور من افراد القبيله ويكون حفل اهدافه جمع القبيلتين ونبذ التعصب الي بينهم وكل هدف سامي وطيب يجمع القبيلتين يكون من اهداف الحفل
وبعد فتره يقام حفل ثاني في ديار عتيبه
والله يا اخوان ماكتبت هالحكي كله الا لأني من جد متضايق من الي يصير بين مطير وعتيبه واتمنى يكونون على قلب واحد ويحبون بعض وينبذون التعصب

ما ابالغ اذا قلت ان مطير وعتيبه من اهم ركائز الآمن في وطنا واي اختلاف بينهم والله مو في صالح استقرار الوطن
يقول احد افراد الآسره المالكه اذا مطير وعتيبه معاك انت بخير واذا ضدك وضعك ماهوب طيب ( مع احترامي لكل القبايل وكلهم على عيني وراسي )
اخواني اتمنى تسامحوني اذا خانني التعبير والله اعلم بالنوايا
تفبلو تحياتي
اخوكم
فااااارس