العازمي
مثل السحاب اليا انهمر والا مثل باس الحديد = هاذي عناوين الرساله يارعد ماغارها!!
خلوج ابن رومي تحنّ وضيّروها من جديد = وحوارها ماسد فيه حوار غير حوارها!!
العمــــــدة
فالحالتيـــن الراي كله مع هل الـــــراي السديد=والبنـدق اللي معي لا يمكن يطيش عيــــــارها
القمري اللي يسجع الحانه على خضر الجريد=من دونه الريـــــــــــــح الشماليـة وقف تيارها
العازمي
اللي يقول المرجله فالقاف وبيوت القصيد ! = بهّرله الدله وقدمها حسب معبارها!!
هوجس معي ياشاعر الروقه ترى الهاجس بعيد = القوم ترسل قبل تبدا بالغزو سبارها!!
العمــــــدة
وقفات ابو ليلى الشهيرة ما يــــوقفها لبيد=لكن ابن كلثوم قومه .. ليش ماتت نارها
على ظهور العيس شيل وحط والساري وحيد=لا يرمي الشرهه على قوم ً طوال اشبارها
العازمي
سل المهند يالشجيع ابن الشجيع ابن الوليد = مع درب قومٍ فالدير كلٍ يعد اخبارها!!
بنيتها عامين يالعمده على الساس الجويد = واليوم لو نهبد خشاش الارض طار غبارها!!
العمــــــدة
رميت غمده .. والعدا بين الموسد والطريد=والصايح اللي صاح ما شفناه يغزي دارها
يالعازمي نخشى تزيد الشمس ويذوب الجليد=وتدق بنت ام الكباير للخلايق طارها
العازمي
ماباك تصنع موقفك من موقفي والله شهيد = انا صعوط القوم وانته يارعد قبارها!!
يوم الضعون وسوقها والبدو يطرون الشديد = الناس ماتفزع وتستر عار ماهو عارها!!
العمــــــدة
حفر القبر يوم المثارى للجواري والعبيد=لا تسندونه للرجال اللي بعيد انظارها
دار الخلافة من يقسمها قبل موت الرشيد=والكوفة اللي من بلاده ما يجوز انكارها
العازمي
كفو. كفو . لكن باقي يارعد هل من مزيد؟= خوي جنب وفالمواقف من خيار خيارها!!
اللي يحررها مامد القوم بالمد الزهيد = واللي جلا منها ذلوله فوق خده زارها !!
العمــــــدة
ولا على شرواك زود ومن جنابك نستفيد=لا درهمت سود السنين بقومها وانصارها
الشعرة اللي يابن عاصي بين عمر وبين زيد=لابد تدراها وتعرف شرها من خارها
« آخـــر الـــمـــشـــاركــــات »
30-Dec-2009, 12:39 PM
العرض الشجري