سلطان الجذع .. تفضل

[معجب العتيبي]

حمد بن جوباح

سلام زود ونقص يا سلطان والمعنى سليم = قدم الرجال اللي تحكم الشور / والساري سرى
لا تنقل العيبه على غاربك بتمور القصيم = عان الجزيره كلبوها تمور / والساري سرى

سلطان الجـذع

يامرحبا ,, كانك مسيّرها على النهج القويّم = وسلام لاجبت العمي والعور / والساري سرى
انتم طرشتّوا للحساء مع درب الاجداد القديم =وجيتوا بخير وزادكم مخشور / والساري سرى

حمد بن جوباح

أثرك يا سلطان الجذع في واقع الامه غشيم = شبيت لك نار ٍ بدون قدور / والساري سرى
حنا كفلنا أيتام مير انته سبب دمع اليتيم = ترضع حليب امه ويبقى السور / والساري سرى

سلطان الجـذع

احيان يابدر الدجا ,, واحيان يالليل البهيم = اعرفك عرف حبيّب لمستور / والساري سرى
كلٍ جرابه فيه مايكفي .. وسمنه فاليديم = بعد انزلوا فالوادي الممطور / والساري سرى

حمد بن جوباح

موسى كليم الله ولا انته يا الجذع مثله كليم = داخل على الله من كلام الزور / والساري سرى
ما عاد تفرق لو تجينا لا بخيل ولا كريم = وش قيمة اللقمه بلا حنجور ؟!! / والساري سرى

سلطان الجـذع

استغفر اللي قد دعيته بين زمزم والحطيم = ياشاعرٍ شعرك بدون شعور / والساري سرى
اللي يكد الدقن خمس سنين ويخطب الحريم = ماهو بلاقيٍ في تهامه حور / والساري سرى

حمد بن جوباح

ما جيت محرم في منى غير أرجم ابليس الرجيم = وإن ما هداك الله عليك الدور / والساري سرى
لا تنقل البندق ولا تملا الذخيره فالبريم = سابقك مطلق راعي الباكور / والساري سرى

سلطان الجـذع

ارجم ابليس وعطني الاخبار في روضه خريم = لن عدت لي من حجك المبرور / والساري سرى
تقول لي جابت ولد وأقول لك ماتت عقيم = العام في تالي شهر عاشور / والساري سرى

حمد بن جوباح

الظاهر اني لو آذرّ الملح فالجرح الأليم = تنقل خبرها في ظلام ونور / والساري سرى
هات الرحاء واطحن شعير وبر يطلع سيم سيم = مير اعرض العله على الدكتور / والساري سرى