سلطان الجذع ..
من هجوسٍ تطرب هواة المثايل من طربها = مرحبا ترحيب ماقالوا هل الترحيب زيّه !!
لو تشب النار يابن دحيم وتكثر حطبها = والله انك ماتمش الوسم من خد المطية !!
سلطان بن دحيم
من هجوس(ن) مثل صلو النار تحرق من قربها = البقاء ردية(ن) تمشي على عشرين نيه
المطيه حولو سلطان عقب انه ركبها = والرسن نصف(ن) معه والنصف الاخر في يديه
سلطان الجذع
الزلامي قال( طيب الدار من طيبة عربها) = علم اهل الطايف اللي تلفت يم الحويه !!
اعتبرها النشبة اللي ماانت سالم من نشبها = ماتوردك الجهاله غير لحياض المنيه !!
سلطان بن دحيم
ما حسبنا للعلوم اللي يا سلطان تحسبها = والعرب تمشي على القانون بعزوم(ن) قويه
كل عام ودمع عينك مغرق(ن) ضافي هدبها = ولا يمش الدمع من عينك سواء راع الرعيه
سلطان الجذع
أعلم اني لو اشوفك نازلٍ في سودة ابها = لاقلعك ياصاحبي منها مثل مقلع طمية !!
البيوت اللي دخلها ,, والبيوت اللي كتبها = مالقى منها رفيقك لاكثير ولابليّه !!
سلطان بن دحيم
لو تنفص بالعيون ولو عمامتك تعصبها = اعرف انك قدمنا ياصاحبي تحسب ضحيه
والله لتتعب ولا يخلف عليك الله تعبها = و الوعد قدام يا راع الحيل والعنجهيه
سلطان الجذع
الحلوب اللي منّول كل ليلة تحتلبها = ماحرمتك درها الا يوم قدمت الخطية !!
الرجال اللي تطالبها وتم الله طلبها = لاتواعدها ,,,,خذت,,, مطلوبها والنار حيّه
سلطان بن دحيم
ندري انه ما بقالك فالحلوب الا عصبها = واعرف انا ما رجينا درها نذر(ن) عليه
لو تشب النار ما غيرك يحول في لهبها = وانت لك في كل ديره يا ابيض الشارب قضيه
سلطان الجذع
المهم تفداك ,,حتى لو نسب جدك نسبها = الغنيمة من عقيد القوم لافراد السرية !!
والله انا مانلومك محرقٍ نفسك غضبها = فاقد شداد الذلول وفاقدٍ سرج العبية !!
سلطان بن دحيم
تدري ان نحاسها ما ينتقارن مع ذهبها = والعرب تدري عن اهل الطيبه واهل الرديه
محتمين(ن) سرجها وشدادها ما احد(ن) نهبها = وانت خلك بين خلق الله في نجد العذيه
سلطان الجذع
لحيتك مااعطيتها بين الكرام الا شببها = والصبح بكره بمرك وألحق الكيه بكيّة !!
النتايج للزمن والناس كاتبها كتبها =من متى الانكار يخلف فالعلوم الواقعيه !!
سلطان بن دحيم
لحيتك جاها شببها وانت يالصاحب سببها = وبكره احولك يا سلطان في نار(ن) لضيه
انت طمعان(ن) تغلب رجال ما رجل(ن) غلبها = لا تهقوى فالرجال اهل الشجاعه والحميه
« آخـــر الـــمـــشـــاركــــات »
10-May-2009, 09:16 PM
العرض الشجري