معلقة عقاب بن سقيان... في الاسهم والاسعار واحوال الزمان...

[عقاب بن سقيان العتيبي]

بسم الله الرحمن الرحيم

الله اللي في شئون الخلق واكوانه خبير=جل ملكه من نعيمه دعوة الداعي تجاب
يوم نحشر في نهار عبوس قمطرير=جعلنا من رحمته عن جحيمه في حجاب
يوم افكر في الليالي قدم رجلي يحير=جعلني من قلب العقل في وقته واصاب
باسمك ابدا ياكريم دجا ليله منير=من عبيدك شاعر مبتدي واسمي عقاب
عاقل وان قمت اسل الحسام من الجفير=لين شاردها يجي له مع الدرب انهذاب
صيد فكر لاتلاطم يجي صيده وفير=اتخير من جزيل ركد جوه وطاب
اتخير والحق الوارد مهاذيب الصدير=من طميم دون لولوه ملاطيم الغباب
ليش اردد ماكتب قيس وانقل عن زهير=ويش ودا منتدانا مفيد ويش جاب
كان ماقدح من زنادي عسى عمري عمير=من هبط سوق العجايب شرا منه العجاب
الشرايا من حراج الرخص لوهي حمل عير=ماتساوي في المراجل كحل عكش الهداب
ماسمعت اشهر من الشعر والاسم الشهير=غير شهرة عالم فاتح للعلم باب
نير من نوره الامه تنار وتستنير=كنه اللي لابدا تطفي لواعيج الشهاب
ينفى خبث الحديد ليا غطاه بنار كير=والجهل ينفيه علم لايشك ولا يشاب
ولاسمعت اطيب من الجود والسيف الشطير=غير فزعة فيصلي معه لين الجناب
فيصلي في الزعامه ماترك ند وخشير=قاطب جمعه عجاجه مثل بيض الرباب
في مرازيم يناقرها من الشرقي نقير=نزعة بالسيف ماجابها الحزب انتخاب
ابلج كنه ليا قام في الشرق الامير =قبل يطلع من شعر شاربه عشر النصاب
في صباه مجودينه بكمه لايغير=غارة تشبع من السدح جيعان الذياب
مالي راسه طموحه يبا الملك الكبير =لو يشور العاقله قالوا الحلم السراب
ولا سمعت اعدل في اماره من الرجل الوقير =سيدي سلمان زبن المجنا والهياب
حاكم يلقى جواره بالقسى من يستجير=سيد من سد ريعه حجم دمه وراب
جعل عود جاب راسه يدخل الجنه قرير=لايناقش في الحساب ولا يجي فيه ارتياب
ولا سمعت اكثر ظلاله من اشباه الحمير=غير غاو يقتل المؤمن الامن ارهاب
هامل يرعى همل في محام وفي محير=والمهايط لاصفقته عرف رشده وتاب
فاشي عاشر مهبل وبؤسين العشير=فيه نزعة طيش حلم وفيه لويه واضطراب
ولاسمعت انجس من الفار لو انه صغير=غير من ياخذ سلفك وكشر لك بالف ناب
كلما طقيت بابه وقف ورعه خفير=لايقول اقلط تقهوا ولا عنده جواب
ضنوة تغذى نهايب وواقعها مرير=وان بقيت تغذى كذيا افت الكسر العياب
ولاسمعت اترف من البنت واحلام السرير=غير عيشة كافر جاله المال انصباب
في ملذات الحياة مفلي فلية خضير=بين ترفات الصبايا ومائدة الكباب
سحنته في كل حانه سحنة النجس الفوير=سيده من سادبه واخذ القدس اغتصاب
الكيان اللي تكون للملاعين الظهير=كونوه مخادعيه بين هدنه وانسحاب
طغمة قامت تمير من العداه وتستمير=ترتكب فينا الجرايم من الغل ارتكاب
والوهن فينا نحب الشتات عن النفير=والوهن مثل الحماقه وخطبتنا اقتضاب
تغضب امه تركع امه ولا يغضب سفير=نجتنب ما يرفع الظلم والبغي اجتناب
ولا قريت اقشر من العلم الاقشر والنبير=في متايه ديرة كلها خلي رحاب
ومن تفاهة عالم الزحمات والوقت الاخير =ماقريت من التفاهه غير فصل في كتاب
حايك الوزره توزر من الزور الحرير=هالة في وجه شايب شيبت ريش الغراب
من زمان سير طيره يفك ولا يطير=تغتني منه الغواني مجون ولا تهاب
حرمة اللهو المحرم باحاديث النذير=هو نزير اللي بحمده يسبحن الهضاب
اسمهن فرقة طربنا وباشتهن مدير=ديشة لو يطفي النور جاء في اكتراب
ماتبي شقرا حياها ولا تبغى شقير=كرهت بنت الحمايل في العباه وفي النقاب
واجمحت جمحة جواد على حفة شفير=عزتي لك يالكحيله من مسممة الحراب
الرعاع اللي تغدى البوايت والخمير=الزلايب بشكة الدسكو معاويل الخراب
شطحة الشيطان تقنعها عن اقوال البشير=من مناقبها التبجح باللعان وبالسباب
لاحياة لمن تنادي يامناصحها خسير=شلة لا ترتجى لله ولا فيها ثواب
خلها تقعد تحت ظل شجرتها القصير=الليالي تدب الغاوين بسياط الاداب
الزمان اقشر وقشرانه مطفقها دشير=فيه مبطي لوعة في الكبد ودماغه مصاب
عرف ديكه مع حراره مثل عمة جرير=فاطمي فسحته مع جواريه انتداب
ماكل الناشف ولا مد للنزم الحصير=في يمينه عن مصافح مساييره خضاب
شايخ في تالي الوقت لو هو شيخ غير=ماورثها عن هل الخيل متعبت الركاب
من صغر سنه وهو يركب الموج الغزير=ينتسب للمال ما معه للجد انتساب
شوق دنيا ما تلبس له الثوب الستير=عيطموس تكسي الكم تلعات الرقاب
صبوة العشاق فيها وهو طفل غرير=في غرير الناس ذهبت عساها للذهاب
مابقى الا يفرش المرحاض بالفرش الوثير=مادرا ان الخالد الله والخلا بيت الذباب
ماترجل عن ظهر ددسن حمله شعير=ينتفض من قشر حضه وفي قيره خراب
مابها حتى الفرامل ولافيها سبير=شبهة من يوم تقبل تثير بك الرعاب
كن صوته لاشتغل حف هيش فوق بير=يوقظ النايم حطيمه وتنبحه الكلاب
مرجلة من شاب راسه وهو يضو العصير =ما يعرف من المتايع لا طعام ولا شراب
زين يوم انه مع التمر يلقى له مضير=ما ضحكت له دنيته يوم بالغر العذاب
والعمر تطويه بقعى على بكره وسير=والحضيض اللي تزهب للسفر زاد وزهاب
كل نفس لو تعيش قرون قافيها مسير=وردها حتم على الله وقافيها عذاب
الصراط اللي نصبه الله على متن السعير=مايجاوز زلته غير من صلى واناب
ان رضي حضرة جنابه غرق واد الجرير =في نهار يشعل البيد مامره سحاب
يختلط نبته وينقع تحت عشبه غدير=رحمة نزالها شيدت بيض القباب
كيفة فيها الزبيدي مصاليع نثير =تمتلي منه المحاجر وتكتض الشعاب
ليلته غير الليالي لها نسمة عبير=مانبي مع شرهته وعد اذاعه في خطاب
في حشايم سيد المال ما فينا الفقير=لانبي كدة تكاسي ولا نبغى احتطاب
لو يقلل مدته تشتري سودة عسير=بقعة من طيبها عانقت فوق الضباب
وان زعل حضرة جنابه جهلنا في المصير=مابقى في السوق سهم بخير ولا اكتتاب
ماتذيع اليوم كله صبا عوده خطير =نكبة في سوق من سوق وافلاسة حساب
نيدم الرز اللبن ونتحرا وش يصير=خايفين الفقر يرجع ويبلن الثياب
بين مطرقة الحوايج وسندان الضمير=نشبة ينشب بها العاقل المدرك نشاب
البطاطس والبصل في السوق قيمتهن بعير=حالة تشكى على الله ولله الماب
كل نعمه في طرفها الفتن والله قدير=والفقر في ديرة الرجال محنه واغتراب
والغناه بعيد ملك لمالكها عمير=حافظ قدره مع القوم لو يامر يجاب
في هموم وصابنا من سقطة الدولار ضير=ارتفع نفط العرب مير عملتها هباب
هب ياوقت تشرا معه شر شرير=اختلط شره وخيره وهو وسط الجراب
في بريم النمر الاكبر عشاء اخوه النمير=والعوض صفح يجمل يجمل واحتساب
مادرا ان الظلم بلوا رحاته تستدير=والبغي داب مطوا مطوا واخو داب
ذابت الدنيا كذيا ذوب شهد في عصير=حفلة في عرس ماضي ومحيتها عتاب
في جوانبها صديح المعازف والصفير=حقبة راحت وقفت خطا ولا صواب
مادرت عنها الاذاعه ولا الكاتب سمير=اللئيم اللي يبها رعايا وانقلاب
اطمش فيه الطماشه ولو انه بصير=حاضر شاهد يمجد حضور مع غياب
من بقايا ناصرية خطابات تثير=عبرة الباكي على احلام الامه والشباب
وش بقي من يعربية هل الحلم القدير=غير طاروق حدوا به ركايبهم وشاب
ماعلى الحارث ملامه من الجمع الغفير=لياحلق غرة مهلهل وحاث له التراب
من يلومه لو ذبح نصف تغلب في جبير=والولد والبل غلاهن تغلغل في اللباب
تلحق الفزعه وراها ويكسبها الظفير=والثمن روس النشاما تسافيها المهاب
سور ذيب تارك سوره للطير=والسلامه للذليل اللي ترك عزه وهاب

شعر/ عقاب بن سقيان

[فهيد الايدا المورقي]

عقاب بن سقيان صح لسانك على القصيده الجزله



تحيتي

التوقيع

حسابي في تويتر faheed_1234

[رايد الهديبي]

عقاب صح لسانك مليون

قصيده جزله من راس جزل

وبنتظار المزيد

[عقاب بن سقيان العتيبي]

الاخوه الكرام

بناخي الايداء ..
رايد الهديبي ..

صح ابدانكم ياساده
اشكركم على المرور والمتابعه

اتمنى لكم التوفيق دائما.. وابدا....................

[برااااق]

الاخ عقاب
لايمكن للتعليق ان يعطي قصيدتك بعض حقها
لانها معلقه بجزالتها وجزالة ناظمها
واتمنى لك التوفيق

[عبدالله الجـــذع]

ابو زياد

مبدع ماشاء الله كما انت
في كل مكان ومجال

معلقه جسدت معاناه المجتمع من بعض
الاشياء المفروضه والمعيشه

لاهنت ولافض فوك

محبك

.,

التوقيع

قال الرسول صلى الله عليه وسلم [مَنْ قَالَ أَسْتَغْفِرُ اللَّهَ الْعَظِيمَ الَّذِي لَا إِلَهَ إِلَّا هُوَ الْحَيَّ الْقَيُّومَ وَأَتُوبُ إِلَيْهِ غُفِرَ لَهُ وَإِنْ كَانَ فَرَّ مِنْ الزَّحْفِ ]( سنن الترمذي ) . . قال صلى الله عليه وسلم : ( إن الشيطان قال : وعزتك يارب ! لا أبرح اغوي عبادك ما دامت أرواحهم في أجسادهم ! فقال الرب تبارك وتعالى : ( وعزتي وجلالي , لا أزال اغفر لهم ما استغفروني ) ... ( السلسله الصحيحه ) . موقع يضم جميع القراء هنا

[حاكم الغنامي]

صــــح لسانكـ


ياعقاب



سلمتـــ يداكــ

التوقيع

سبحــــان الله وبحمدهـ hakem81@live.com

[عقاب بن سقيان العتيبي]

الاخوه الاعزاء

براق..
عبدالله الجذع..
حاكم الغنامي..


اشكركم على المرور..والمتابعه..والاطراءت


اشكركم مرة اخرى واتمنى لكم التوفيق دائماااااااا.......................

[@ـايل]

ياسلااااام ...

أردت ان اقتبس بعض الابيات ولكن احترت ...

صح لسانك يابن سقيان ...ولاهنت على هالابيات اللي تحكي معاناه نعيشها في وقتنا هذا ...

لاهنت والله يعافيك...

...........

التوقيع

تويتر : AlHooL@

[عقاب بن سقيان العتيبي]

الاخ الكريم

هايل العتيبي

هائلا فيما قلت ياستاذي

اتمنى لك التوفيق يابن عتيبه وممنون لك