ابو لمار
ياسلام الله سلام(ن) يكيّف كل راس = لوّ بعض الناس بالكيف كبرت رووسها
راح ناس وحلّ بالارض بعد الناس ناس = ناس تعمرها وناس(ن) تريد تحوسها
مرزوق حمدان العتيبي
مرحبا ترحيبة ٍ سيست بالطيب ساس = الوفا من طبعنا .. والصعاب اندوسها
حكمة الله في عباده وعدله مايقاس = كيف تعجب والليالي عطتك ادروسها
ابو لمار
فرق مابين الذهب يالعتيبي والنحاس = والاوادم فالرخيصه تضيع فلوسها
ياعسى ماشر غايب عسى ماجاك باس = وانت راعي الديره اللي تعرف عسوسها
مرزوق حمدان العتيبي
الذهب معروف راعيه مافيه إلتباس = والرخيصه خلها طافي ٍ فانوسها
انت هالايام مادري و رى فيك التماس = صرت من ناس ٍ نحانا ياشين انفوسها
ابو لمار
جبتها ياصاحبي بالتمام وبالمقاس = والحقيقه كل الاسباب من مريوسها
لاتنوش السلك والسلك كهرب فيه ماس = والقضيه من خطرها ضرب ناقوسها
مرزوق حمدان العتيبي
واثق الخطوه ترى ماتغيره الحساس = مير ليت الهند تمنع سفر هندوسها
انت عندك مشكله في حدى خمس الحواس = وان لقيت اعلاجها ضم يدك وبوسها
ابو لمار
في البدايه كنت شعله وماليك الحماس = والعشيه صرت لقمه تحيت اضروسها
قلبك اسود لو لبست الجميل من اللباس = والحسود من العرب يخدعك ملبوسها
مرزوق حمدان العتيبي
الله اكبر كم سقيتك من الامرار كاس = لين عفت الملعبه مع لحن منكوسها
سامحك ربي على تهمتك يابو نواس = الله اعلم في صحاح العرب وانجوسها
« آخـــر الـــمـــشـــاركــــات »
17-Feb-2009, 10:53 PM
العرض المتطور
