سعود العصيمي
ياسلام الله سلامٍ طارقٍ باب الحقايق = عد ماهلت هماليل الخيال المستهله
وانت من فضلك ياعيد العازمي وقف دقايق = عندنا لغزٍ نبي نطرحه وانت جيب حله
العازمي
يالعصيمي مرحبابك قبل تفتيش الوثايق = عد ما فالكون من مخلوق أله مذهب ومله
مابلشنا بالعلوم اللي على عرف وطرايق = طارحين الشاره اللي ضوحها مابان كله
سعود العصيمي
قبل كم من يوم شفنالك صور ماتنه بلايق = إطلعت وسط الجريده واطلعت وسط المجله
واثرك اللي يخدع المسلم وله خائن وبايق= وان صرف لك كنزه المصرور حلقك مايبله
العازمي
اصبرو شهرين لين نحطّلك بعض العوايق = ثم تطلع صورة اصحابك على افراش المذله
لاتعلمني عن اللي فالزمن صارو علايق = مار مد يداك للحبل الجويد ولاتفله
سعود العصيمي
لو سمح لي بندر ومرزوق ولعت الحرايق = فيك ياللي نازلٍ منزال مانت ابمنزلله
لاتوصي واحدٍ قد حط في راسك شقايق = شاعرٍ عنده رصيد ويعقد الحبل ويحله.
العازمي
لو عن عمك دريت انّه علاك اليوم ضايق = كان يمكن تقلع جبال السراه اللي مطله
انت مفلس للحمول الجايره منته بطايق = مار لانعمي عيونك شوفنا مثل الآهله
سعود العصيمي
عمي اللي قلت ابا اروقه لين ايصير رايق = وانت ابا احوّل على راسك حصاتين وتهله.
تدري إني مثل نجم الجدي من فوقك موايق = مار عاوني على المقرود قلبي لاتعله.
العازمي
لو تبا ترض الصغير العم الاكبر جا يهايق = مار مايرضيه حتى لو تحطه وسط فله
في مجال العرف لو تملك جوازات وبطايق = يرعبك سيف الحقيقه كل ماقمنا نسله
« آخـــر الـــمـــشـــاركــــات »
15-Oct-2008, 10:54 PM
العرض الشجري