بن شريم ، رخص الحصان ورخصو الطيبيني

[معشي اللوافي]

البارحـة مـا ذاقـت النـوم عيـنـي "
" هــمّ بتنجـيـم بفـكـر بهـوجـاس
واصبحت من غبّ السهـر والونينـي "
" جسـم برمّـة مجـرم عنـد حـبّـاس
صبـرت ليـن الصبـر بيّـح كنينـي "
" ولا شفت لي من جملة الصبر نومـاس
شابت عـوارض لحيتـي قبـل حينـي "
" وقنعت من عقـب الفوايـد بالافـلاس
من شـوف الدنيـا تجهـر الغافلينـي "
" ترفع ذنـب وتطمّـن المتـن والـراس
تبدّلـت هـرج الـعـرب بالرطيـنـي "
" وقامت تجنّس لي على سبعـة أجنـاس
رخص الحصـان ورخصـوا الطيبينـي "
" وغلى الحمار وما اشتبه له من النـاس
وقـام الـردي يدحـم بجنـب متينـي "
" وابن الحموله قام يمشي مـع السـاس
وقـلّ الرفيـق وقـلّـوا الغانميـنـي "
" وكثر الحسد واهل النمايـم والانجـاس
شان الزمان وشـان وجـه الضمينـي "
" وتغيّـرت كـل الطبـايـع والالـبـاس
والمال صـار مـع المـره والدوينـي "
" والطيب راح وقطّعـت عنـه الارمـاس
وخليـت كفـوف مدلّهيـن الحزيـنـي "
" واللي تورثّهم شعـر سـاق وحسـاس
والذيـب جـاع وكـل ثـور بديـنـي "
" والحر برقع وابـرق الريـش فـرّاس
وذلّ الجسـور وكـلّ حـد السنيـنـي "
" وتكشيف عرض الناس هو سهمة الناس
والمرجلـة نسخـت مـع المارتيـنـي "
" وتعوّضـوا عنهـا بخوصـه ومكنـاس
وقام الردي يحشـم مـع الحاضرينـي "
" والراس ديس وخدّم الحر ابـا الحـاس
وصار الصديق اهـو العـدو البطينـي "
" يشرف عليك ويصبح الصبـح بـلاّس
وطرد الهوى بختـوا بـه المفلسينـي "
" شرّابـت المصفـاه طبّاخـة الـفـاس
وختـام قيـلـي ايـهـا السامعيـنـي "
" صلوا علـى المختـار ماهـل رجّـاس
والآل والاصـحــاب والتابعـيـنـي "
" عد النبات وعد حصحـاص الاطعـاس