جمعت لكم ..(بعـض ) .. قصاائد المبدع / مشعان البراق ..
( سلوم وافين الاشبار ) !
ماني بميّت نار ياميّت النار=رزقي .. ضمنه الله عزيز الجلالي
من دون ماء وجهي عن الضيف والجار=ماني بحاسب وش غدا من حلالي !
لا مسّكرٍ بابي .. ولا مدوّر اعذار=وصاة ابوي وسلم عمي وخالي
سلومنا .. وسلوم وافين الاشبار=وحنا علاهنّه من اول وتالي
حنا حرار .. ومن صواريم الاحرار=لو عاكستنا مقبلات الليالي
نجزع من الميلات لاصار ماصار=ونصبر عليها مثل صبر الجمالي
صبرٍ يذوّقنا معه مرّ الامرار=مرّه على كبود الشغاميم حالي
( 15 عام ) .. !
سنين مرت .. كنها قطعة ايام=راحت من سنيني ولا ودّعتني
اللي بقالي منّها .. روس الاقلام=ذكرىً تذكرني بـمن خالفتني
جيت الديار اللي من العام للعام=ازورها .. وأطلالها موحشتني
صدفه .. وكم جرحٍ بعد غفوته قام=عرفتها يوم انها عارضتني
وقفت مابين الحقايق والاوهام=مرت علي الذكريات .. وخذتني
لحظات في عيني مثل طيف الاحلام=اللي لـ( هذاك ) الزمن رجعتني
لـ( ايام ) .. ماكنّا نفكر لـقدّام=يوم اني ارجيها .. وهي راجيتني
راحت بحفظ اللي كفل رزق الايتام=الله يسامحها .. وراء ماحترتني ؟
راحت ونكّست البيارق والاعلام=وقنعت يوم ان السلوم اجبرتني
اليوم مرتني تخطّى بالاقدام=عدت علي .. وكنها ما اعرفتني
ماكنها اللي خلت ضلوعي حطام=ولاكني اللي قبل اسافر بكتني
مدري اعرفتني ! بعد خمسة عشر عام=والا انها بعد كبرنا .. نستني ؟
( حيل الله اقوى ) .. !
حيل الله اقوى مابقى في يـدي شـيّ=مافيه حـل ٍ فـي يدينـي.. ذخرتـه
حاولت .. لكن المحاصيل هيّ هـيّ=الطير طـار ولا بقـى الا شجرتـه
وقفّت اشوف شويّ واغمّض شـويّ=واللي انكسر في خاطـري ماجبرتـه
لين الحقت شمسي على بارد الفـيّ=وشفت ان كل اللي جمعته خسرتـه
من كثر ماعزيت ريقي عـن المـيّ=ملّ الصبر من كثر صبـر ٍ صبرتـه
كم هقوة ٍ ضاعت على سكـة الغـيّ=وكم حلم فـ( تراب ) الحقيقه قبرتـه
واقف .. وطعنات الزمن كلهـا فـيّ=وساقي لو انه كلّ منـي / كسرتـه
بعد ماعاش اليأس في احساسي الحيّ=اخوي .. لو هو صد عنـي عذرتـه
مدري عن اللي كنت احسبه بقى ليّ=اللي حزمت ابه الضلـوع وذكرتـه
اللي طوى حالي بحكم الهـوى طـيّ=قصّر .. وانا كل الطريق اختصرتـه
ماهو خطاء لاقلت ( تأمر على شيّ )=الا الخطاء .. لا اشتقت له وانتظرته
( يانجم ) .. !
لو اقدر آصلك يانجـم ٍ لمعـت بسمـاي=الارض ما أظـن تعرفنـي ليـا جيتهـا
من دونك الجاذبيه .. والنجـوم بفضـاي=اكثر من وجيه ناس ٍ ماظهـر صيتهـا !
ياليتها من علـوم ٍ مثـل هـذي وجـاي=كان الفرص يـوم جتنـي .. ماتعديتهـا
بلاي من شرهة ربوعي وفرحة اعـداي=هذي هي الساعـه اللـي مـا تمنيتهـا
آثرك مثل السراب اللي مايقطع ضمـاي=لو انـي اتعبـت رجلينـي .. وعنّيتهـا
درّ في مدارك وانا ادّرج مكانـي اخطـاي=عـد اوقفـت خطّـر ايامـي وداريتهـا
والا طموحي ! بعيد ابعد من اخـر مـداي=ولو انهـا بالعـزوم / عزومـي ابليتهـا
لكن يآسي غلب علـى حقيقـة رجـاي=وهزيمتي مـن مرارتهـا .. اسلتذيّتهـا
وعلى كثر مانسفت مـن الحقايـق وراي=تموت الاحلام لكـن مـا انهـدم بيتهـا
مدري خطاك انت والا الحظ والا خطاي !=سـؤال .. منـه الاجابـات استشفّيتهـا
علوم .. والونّه المتفجـره فـي خفـاي=غفت على وسادة ضلوعـي وصحيّتهـا
وبقت لي الذكريات اللي عزاهـا عـزاي=الله مـن ليـل .. سرتنـي وسرّيتـهـا
هي مكسبي من مقاديري ورحلة شقـاي=وهي راحتي لا اشتكيت الهـا وناجيتهـا
معها .. واسولف لحالي من خلاي بخلاي=كـم خففـت ضيقـة ٍ فالصـدر كنيّتهـا
يانجم ليتك تغيـب .. ولاتكـدّر صفـاي=يكفي عليّـه جـروح ٍ منـك عانيتهـا !
طابـت .. ولكنـك اللـي ماتـدور دواي=عاشت ماخليتهـا .. وابطـت ماداويتهـا
ماهوب انا اللي يجي ويروح من غير راي=علاقة عيوني بـ.. نـورك قـد انهيتهـا
اللي خسرته دفاء ناري فـ.. بارد شتاي=واللي كسبته مبـادي ٍ ماتـت / احييتهـا
هذا انا في عيون اعداي قبـل اصدقـاي=اموت .. والدمعـه الزرقـاء ماهليتهـا
الا على من قدر يكسب رضـاي وثنـاي=هـذا حياتـي عشانـه .. ماتغاليتـهـا
انهيت معـك البدايـه وابتـداء منتهـاي=والجمـره الحيّـه بـ.. كفـيّ ضمّيتهـا
ماني بعايـش علـى لعلـي وياعسـاي=ان ما قـدرت آدرك الامـال / خليتهـا !
( غلا نجد ) .. !
تلاذع فيوز القلب لا سولفـوا عـن نجـد=وعزي لـ( قلب ٍ ) هاجس الشوق يبحر به
تعدّت نجـوم الليـل وانـا اتوّجـد وجـد=وجود الكبير .. اللي زمانـه مقصّـر بـه
علشان من حبه بجد جمـع حالـي بجـد=وصخّر مشاعـر شاعـر ٍ لاوع الغربـه
يا كمّ اهجدتني في منامـي طيوفـه هجـد=ويا كمّ اسهرتني سربة ٍ من وراء سربـه
حروف القصايد عند طاريه تسجـد سجـد=وتركع لـه القيفـان يـوم اتبّاشـر بـه
غلا واحتـرام ومقدريـه وحـب ومجـد=لو انه .. طوّى حال المعنّـى وعـزّر بـه
من البعد دقلات العنا في ضميـري رجـد=متى الله .. يبعّد ساعة الضيـق والكربـه
غلا نجد زاد .. وزوّده من سكن في نجـد=عسى نجد كله للحيا .. شرقـه وغربـه
( عيد رأس السنه )..!
الشعر .. مثل الغريب اليـا جفـاه وطنْـه=والشاعر .. بلاد واحساس وشعور وحنين
يسكنّي اليا غفيت بوحدتي .. واسكنْـه :-=لا احتاجني في فضاه اطلق سراح السجيـن
استعذبه كثر ما اتعب فيـه واتعـب منْـه=وابحر معه للجـدي وسهيـل والفرقديـن
لو اني اشوفـه اقـرب حاجـة ٍ ممكنـه=واتنفسه .. مثل مـن يتنفـس الاكسجيـن
لكنّي احيان لا راهنت به .. مـا اضمنـه=مواقفه معي .. يحفظهـا شريـط السنيـن
يخونني .. لو وراء الهقوات اتـلّ ارسنـه=الا ليا جـاء مجالـك يالثميـن / الثميـن
يزيـن معنـاه فيـك .. ويستقيـم لحنْـه=ويصير في راحة اوراقي مابيـن اصبعيـن
حتـى انـه بمملكتـك يمـارس الهيمنـه=ومشاعري كنها انصار الحسن والحسيـن
وانا القمر كل ماشفت السحـاب احضنـه=اذكرك واقول يخلق مـن شبهـك ( 40 )
من ذاق طعم الهوى بعد ضمـاه .. ادمنـه=معذور .. والعمر مـره ماهـو بمرتيـن
راعي المحبه علـى متنـه يشيـل كفنْـه=مايدري .. اخر دروبه تنتهي فيـه ويـن !
هو يحسب ان العرب .. ما احد ٍ بداري عنْه=لو ينصحونه .. يطالع فيهم بنـص عيـن
القـرب يامصعبـه .. والبعـد يامشينـه=بالمختصر ماهو بـ.. طيّب من الحالتين !
حتى نسيم الهوى البارد لا هب .. اشطنـه=كنه محمّل .. بريح الفـل .. والياسميـن
انا كـذا .. والغـلا شامـه شبيـه يمنْـه=يامجدد ٍ في غيابي .. كـل جـرح ٍ دفيـن
اغيـب واعيادنـا ماهيـب فـ.. الازمنـه=اعيادنا .. كل يوم .. وكل لحظـه وحيـن
ماهو ضروري نعيّد عيـد راس السنـه !=من فضل ربـي علينـا .. دايـم معيديـن
نعمه ..والانعام عنهـا : تعجـز الالسنـه=( الحمـد لله .. رب العالميـن اجمعيـن )
/
(ــــــــــــــ)..!
لا أخذت في خاطري من واحد ٍ غالي=ماعاد ابي الناس قاصيها ودانيها
ماعاد ابي اللي ينشّدني عن احوالي=العزله .. ابرك من الدنيا ومافيها
اجلس لحالي وانادم نفسي لحالي=مهموم / وهمومي الله لايحييها
اغيب عن مجتمع خلق الله أشوا لي=وادلّه النفس .. لين الله يسويها
اضحك وانا الصدز .. لاداله ولا سالي=من ضيقة ٍ ماتجنّب عن حراويها
لا اونستها في ضلوعي كنها الصالي !=الناس ماعاد اناديها بأساميها
كنيتها لين شفت الشرّ في حالي=عجزت لأهرج بها وازريت لا أخفيها
ان جيت ابهرج بها شي ٍ ماينقالي=وان جيت ابسكت لـ( نار ٍ من يصاليها ) !
حتى تساوا مذاق المر والحالي=حسبي على كلمة ٍ ماني بناسيها
ياليتها من عدويني وعذالي=والله لـ( تلقى ) الجواب اللي يدوايها
لكنها من حشيم ٍ منزله عالي=احترت فيها ولا ادري وين اوديها !
مردودها كل مامنّه تهيّالي=شيّمت نفسي عن اولها وتاليها
تمرني .. جعل والله مالها والي=ماكني اوحيتها من فمّ راعيها
واصد من دون لا أشاور ولا أمالي=بضاعة ٍ بين بايعها وشاريها
ماني بـ( ناقص ) غرابيل اول وتالي=روحي من الوقت فيها مايكفيها
سوالف ٍ كل مامرت على بالي=سمحت من خيرة ٍ كنت متحريها
ياحرّ كبدي وياهمي وغربالي=مصيبه ان كان حاميها حراميها
ضايق وضاقت بي فجوج الخلا الخالي=( والنار ماتحرق الا رجل واطيها )
مهما يدور الزمان ويأمن الجالي=مايجرح الروح غير طعون غاليها
( شـاعر زمانه ) .. !
ماللشعر نكهه .. ولاعاد له ذوق=من يوم كلٍ صار ( شاعر زمانه )
اللي يغني به على كل طاروق=واللي يجر الصوت ياليل أدانه
أصبح قضيه بين سارق ومسروق=ولاعاد ندري من عليه الادانه
اليوم صار بضاعةٍ مالها سوق=طلع فلان .. وصفقت له فلانه
وانا ماعاد أحرص ولا أشفق ولا أتوق=ولاعاد له بين المعاليق خانه
الا / لجزله ينفتح كل صندوق=هذا هو اللي يستحق الحصانه
سواة نجمٍ لامعٍ بالسماء فوق=عن كل من يبغى ينزل مكانه
اْله عليّ حقوق .. وحقوقه حقوق=حقوقه اشبه في حقوق الامانه
أقدّره لو كان ماهوب مخلوق=وارفع مقامه عن مقام الاهانه
اضرم عليه اضرام عاشق لمعشوق=ان كانه أشفى خاطري ترجمانه
آظن يجمعني معه دم وعروق=أخوي .. وأنا واحدٍ من أخوانه
( الصداقه ) .. !
صداقةٍ ماهيب فالمآقف الحرج=يالاجودي .. لاتعتبرها صداقه
لاوالله الا هرج في هرج في هرج=ولاخير منها .. غير قطع العلاقه
( تعبت .. اقدي العور وادرّج العرج )=ولاني وانا مشعان .. قطّاع ساقه
كم زلةٍ .. حطيتها داخل الدرج=حقٍ علي احفظ حقوق الرفاقه
لين انها راحت مثل حية الخْرج=واليوم .. ماعندي على الصبر طاقه
ماعاد باقي للتسامح .. ولا برج=تقطّعت كل السلوك الدقاقه
نبي نشب النار .. ونطفي السْرج=من يومها وصلت لـموس الحلاقه
( البشت ..)..!
متى عرفت البشت يالابس البشـت !=البشت ملبوس ٍ لـ( راعِ ) الزعامـه
ترزّ به .. وتضف جنبه ليـا كشـت=مدري وريث شـداد .. والا مسامـه
وان طيّشك راع الحكي للسماء طشت=اللي لاسولـف .. مايثمّـن كلامـه
لاقال لك ..( لا ياطويل العمر عشت )=نسّفت من تحـت العقـال العمامـه
ريّشك.. وانته مع طريقـه تريّشـت=كنك علـى ماقيـل راعـي جهامـه
وانته ليا جات اللـوازم .. تخيّشـت=تقـول قايمـة ٍ .. عليـك القيامـه
حوّشت لك قرشين لكّن وش حشت !=ما حشّت ياكـود الفلـس والندامـه
والله لو انك شاري ٍ لك (100 ) بشت=ما انته بابو زيد الهلالـي / سلامـه
« آخـــر الـــمـــشـــاركــــات »
08-Jul-2008, 03:37 AM
.. من روائــــ ع / مشــ ع ــان البــراق /..
العرض المتطور
