قحص منزل من الجيب الدويش-الجلاوي (سهم عتيبة)

[سويلم الشيباني]

القصه معروفة يانفيع اكثر الناس تعرفها وهي ايام قحص الله يرحمه قبل 15 سنه تقريب كان قحص في الصمان وكانت معه هايلكس قديمة ووده يقطع النفود صحراء يبي نجد والهايلكس ماتوديه يبيله جيب يقطع النفد لان الطرق كلها تفاتيش يدورونه والدويش جايبه خبر من الدوريات ان قحص حوله
والله يسوق قحص على محطة في جرارة يعبي منها لوالله ان راع هاك الجيب الجديد اللي سفط يعبي من المحطة ويوم خلص وقحص يتبعه ويومنه مسك الخط وقحص يعترضله على الخط درى انه قحص والدويش يعطي الجيب نمرة هو ينحاش وقحص يلحقه هو يولع الرشاش فوقه والدويش يوقف قال انت قحص قال ايه قحص ووالله ان ذبحتك اهون عندي من رمشت عيني مار يومنك وقفت ولا اتعبتني في مطاردك اباها من الله وانت اكيد عندك ورعان وحريم والله فكك مني مار هاك الهايلكس رح لورعانك

وقحص يركب الموتر الجيب هو يفتح الدرج لوالله ان المسدس فيه هو يلتفت على الدويش قال رزقني الله يوم اعتقتك بهالفرد ويضحك الله يرحمه هو يقوم هو يعطي كفرت الهايلكس اللي قدام الثنتين كل وحدة طلقة علشان مايروح بسرعه ويبلغ عنه

هو يركب الجيب ويعطي الصحاري والدويش يقعد عند الهايلكس وسلامتك