فارس مقبل العصيمي ونكبة السريه

[خالدالعصيمي]

البدايه ريح مسـك وريـح فلـيّ=بالسـلام ورحمـة الله والتحيّـه
ماكتبت مقدمـة (ياراكـب اللـيّ)=لأجل بعض الناس مايزعل عليّـه
لاعبٍ دولي وهو لاعـب محلـيّ=راس حربة في فريـق القادسيّـه
نقزتة لو زادهـا عشريـن ملّـي=كان يطلع عـن حـدود الجاذبيّـة
مير حظه طاح في خبـرة مسلّـي=العريف اللي نكب عفش السريّـه
طحت مالك شر يا كبتـن مظلّـي=ما انت بأول شخص لمسلي ضحيّه
بنتسابق راعـي الـذود المفلّـي=بين خـط المجمعـة والعاذريّـه
بـدوي ٍ فالمواجـيـب متجـلّـي=متعبٍ نفسه على شـف المطيّـه
يتبع دروب الحيا فـي كـل حلّـي=من ورى رغوة ليا نجـد العذيّـه
مولعٍ بالزيـن مـن دقٍ وجلّـي=ويحتزم بالطيب وعزومـه قويّـه
كل ماجتني علومـه جيـت كلّـي=لين راسي يشتعل فخـر وحميّـه
الكريم اللـي ليـا جيتـه يهلّـي=إن لفيته في الضحى وإلا عشيّـه
مرحبا وأقلط على مركـى وزلّـي=وعود ٍ أزرق والشبب والشاذليّـه
والوناسه والحجـاج المسفهلّـي=والخوي اللي حمى ساقـة خويّـه
ذي طراة الروح والعمر المولّـي=كل يـوم ٍ تقتـرب منـه المنيّـه
والسوالـف فالدراهـم ماتملّـي=ياهل الأسهم ترى عندي وصيّـه
المراعي حظهـا فـوق متعلّـي=أشتروا فيها ترى أسهمهـا نقيّـه
شغلتي فيها مضـارب مستقلّـي=أصبـروا يوميـن وأظـم البقيّـه
واتحـدى بالبيـد وبـا مجـلّـي=ياحليلك يـا اللحـون السامريّـه
آه وآعـزاه يـا الحـظ المتلّـي=ماتهب مـع الريـاح الموسميّـه
كل ما عايـرت فالشـارة تزلّـي=ما عرفت عيـار رمـي البندقيّـه
وكل ما اخطيت الضريبة قلت هلّي=إنطوى عمري وهلّـي سرمديّـه
احمد اللي حطني مسلـم مصلّـي=حنبلي وأفخـر بشـرع الحنبليّـه
السـلام عـداد همـالٍ يهـلـيّ=لسيّد أسياد البشـر خيـر البريّـه
ليت شوف قباله الطاهر حصل ليّ=فدوتـه راسـي وماتملـك يديّـه
يلعن الله من تعرّض لـه وزلّـي=بالكـلام وبالرسـوم وبـالأذيّـه
القضايـا بالسوالـف مـا تحلّـي=قاطعوهـم ليـن تنحـل القضيّـه
تم قولي والنهايـه راكـب اللـيّ=مامشى مثلـه دروب الجرهديّـه