الرئيسية التسجيل التحكم


اختيار تصميم الجوال

العودة   الهيـــــــــــــلا *** منتدى قبيلة عتيبة > المنتديات العامة > مجلس الهيلا العام

« آخـــر الـــمـــشـــاركــــات »
         :: سهيله (آخر رد :ياسر محمد العتيبي)       :: المواهب من الله (آخر رد :ياسر محمد العتيبي)       :: راحتي (آخر رد :ياسر محمد العتيبي)       :: عتيبه (آخر رد :عبدالله القثامي)       :: البطاقة الشخصيّة ( الكل يشارك ) (آخر رد :الذيب)       :: ياطيب راسك يالحافي (آخر رد :@ـايل)       :: نسأل الله السلامه والعافيه (آخر رد :@ـايل)       :: فيحان بن تركي بن ربيعان في ذمة الله (آخر رد :@ـايل)       :: السلام عليكم ورحمة الله وبركاته (آخر رد :@ـايل)       :: ترا الخوي لاصار طيب ومحمود (آخر رد :ابو طارق الشمري)      

إضافة رد
 
أدوات الموضوع انواع عرض الموضوع
غير مقروء 29-May-2006, 12:13 PM رقم المشاركة : 1
معلومات العضو
صنيتان قرداحي
عضو ماسي
إحصائية العضو







صنيتان قرداحي غير متواجد حالياً

افتراضي

هذا ماكنت أخشاه !!!

انقلب الجميع (مطاوعة)




والله كنت متوقع ان تاخذ الردود شكل النصائح والتوجيه والتحليل والتحريم .. الخ

اخواني لا احد يغضب من كلامي كلكم انشاء الله على خير وحاش لله ان نتهم نياتكم
ولانعرفكم ولانزكي على الله . بس ترى الموضوع مو بهالبساطة .عيشوا الموقف

انا ماحطيت هالقصة من باااب التسلية صحيح فيها طرافه بس نقيس عليها
صحيح الموقف مختلف لكن يوجد مواقف اصعب من هذه واقل كذلك!

تجيكم قصة العتيبي
هذا العتيبي طالع هو ومعه ولده يدورون شي يسد الرمق ويكفشوون هاك الرجال جاي من اليمن والظاهر انهم في ذاك الوقت مادروا عن هالمجاعة اللي عندنا لان الرجال جاي للحج ومتكشخ ومشخص لابس دسمال وجوخة والعالم ماتلقى اللي تاكل ساقه القدر لهم ويمسكه العتيبي وولده وينفضونه وياخذون اللي معه من قشه وياخذون حتى الملابس ويربطونه بهاك الشجره
الشاهد واليا وقت العصر والشايب يقعد ينادي ولده يافلان قال سم قال تعال نبا نصلي
ههههههههههههههههههههههههه يبا يصلي!!!
المهم ولده جاء جنبه قبل يكبر ناظر والا الرجال مربوط قدام عيونهم بالشجرة .
قال يبه كيف نصلي وحنا هذا فعلنا؟؟؟
قال عاد الشايب (( ابك صل يامهبول حنا ما نحرز نحارب الله من الجهتين) ؟!؟!؟!


×× اهم شي الامانة مع النفس وانا والله بكون صريح معك وقبلها مع نفسي ومع الله
والله ما استطعت ان احجم عن مساعدته.

اجل الواسطة اين تضعونها؟
ترى الكلام سهل خاصة عندما ياخذ احدنا دور المنظر هنا ينطلق ويكون توجيه الاخر سهل عليه لكن ان يقف نفس الموقف؟؟؟؟؟؟؟؟؟؟؟ هذا مالا يمكن تصوره الا لمن عاش الموقف

لي عودة

تحياااتي















رد مع اقتباس
غير مقروء 02-Jun-2006, 03:18 PM رقم المشاركة : 2
معلومات العضو
sultan
عضو فعال
إحصائية العضو







sultan غير متواجد حالياً

افتراضي حصل لي هذا الموقف

بسم الله الرحمن الرحيم

اخواني أعضاء هذا المنتدى الرائع


صراحه جميع الاخوان اللي شاركوا ماقصروا في ردودهم وكفوا ووفوا وكانت ردودهم أكثر من شافيه مع الاختلافات البسيطه والتي توضع على الهامش مع احترام الجميع لوجهة نظر الطرف الاخر.

أنا حبيت أشارك فقط بموقف قد يكون شبيه للموقف الذي سوف يحصل لاخوي صنيتان:


قبل ثلاث أو اربع سنوات جاني أحد ابناء عمومتي واللي يكبرني بـ13 سنه وهو موظف مدني ويدرس منازل بمدرسه أهليه بالصف الثالث الثانوي وطلب مني أدخل امتحان مادة الانجليزي بداله وكان الكلام ذا بالصيف لان الأمتحان كان دور ثاني بحكم انه رسب بالدور الاول.

المدرسة كانت بالقصيم واحنا بالرياض أنا طبعا وافقت من باب الحميه والفزعه لولد عمي ومشينا للقصيم قبل امتحانه بيوم ,جلسنا نفكر وشلون أدخل وهم متشددين وفيه بطاقه خاصه بالطلبه عليها صورته وطبعا مافيه شبه بيني وبينه والعمر يفرق بكثير وواضح الاختلاف الشاسع بيننا.
بعد التفكير والتسطيح والمد والجزر قررنا اني ادخل الامتحان وتكون بطاقة الاحوال الشخصيه الخاصة فيه هي اللي معاي فقط لاغير .

جينا الصباح واكتشفنا ان الامتحان بمجمع كبير لانهم جمعوا جميع طلاب المادة ذي بمكان واحد دخلت المجمع وهو وقف ينتظرني برا ودخلت أنا باللجنه وجلست في أول مقعد وكان الامتحان بساحة المدرسة والعدد كان كبير .

المهم بدوا المشرفين في المرور على الطلاب والتأكد من هوياتهم وجاء دوري وجاني المشرف وطلب مني الاثبات وعطيته البطاقة(بطاقة ولد عمي)ناظر فيها وطول وهو ساكت ثم ناظر فيني وقال متأكد ان أنت فلان طبعا أنا جيته بثقه وقلت كيف ؟ قال ياخي منت بصاحب البطاقه شكلك يختلف كليا عن صاحب البطاقه المهم حطيت نفسي واثق وماقدر يمسك علي شيء من كلامي وراح الوقت واحنا بين أخذ ورد هو يقول مو انت وأنا اقول الا انا بعدما يأس راح وجاب مدير المجمع ومدير المراقبين وانا كنت جالس بالكرسي أحل وقعدوا يناظرون فيني ويدققون بالصوره وقالوا بعصبيه ياخي تضحك علينا مو انت صاحب الصوره قلت أنا بعصبيه وبنبره عتيبيه أنا صاحب البطاقه ياخي تغيرت ملامحي الزمن غيرها جلسنا نصف ساعه نفس الشيء أخذ ورد وانا أرد عليهم بعصبية وبنفس الوقت بثقه بعد كذا طلبوا مني اثبات اخر قلت ما عندي غير البطاقه ذي شيء بالنهايه قال المدير للمشرف ذا ما فيه أمل خلوه بس يختبر عن خويه (قال خويه لانه مايعرفني ولايدري اني ولد عمه وبنفس الوقت قال بينه وبين نفسه ذا عتيبي ماعليه من أحد ولو ضريته فهو يبي يضرني)وراحوا وتركوني أحل على رواقه لين انتهيت ومسكت الباب وطلعت النتائج بعدها بفتره وكان ولد عمي في مقدمة الناجحين.

روحتي هناك ودخولي للامتحان ومخاطرتي كانت بسبب الحمية والفزعة لولد عمي و باقي له الان ترم أو ترمين ويتخرج من الجامعه .

في النهايه ذكرت القصة ذي فقط دونما ادلاء برأي أو تعليق على مشاركة اخوي صنيتان لأن الفكرة والمقصد ابعد بكثير مما نفكر وكان هدف أخوي صنيتان أعمق بكثير من النظرة السطحية.


تحياتي للجميع















رد مع اقتباس
إضافة رد

العلامات المرجعية


يتصفح الموضوع حالياً : 1 (0 عضو و 1 ضيف)
 
أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا يمكنك اضافة مرفقات
لا يمكنك تعديل مشاركاتك

BB code is متاحة
كود [IMG] متاحة
كود HTML معطلة



الساعة الآن »08:13 PM.


 Arabization iraq chooses life
Powered by vBulletin® Version 3.8.2
.Copyright ©2000 - 2025, Jelsoft Enterprises Ltd
اتصل بنا تسجيل خروج   تصميم: حمد المقاطي