ديوان الشاعر الكبير مخـلــد القـثـامي العتـيـبي

[ابن نجد]

قصيدة (3) : يا راكبٍ حمرا



وقال هذه القصيدة في مدح اخو هملا الشيخ هذال بن فهيد الشيباني وبما يتمتع به من شجاعة وقوة اهابت كل اعدائه

يا راكبٍ حمرا تبوج اشهب اللال
تهوي كما يهوي فريد الادامي

عملية في مشيها ترمل ارمال
عملية من قاطعات المضامي

اليا عطت دو الخلا تهذل اهذال
اهذال ذيب محتديه الظلامي

اسلم وسلم لي علي الشيخ هذال
سلم علي الحر العديم القطامي

ياراكبه مني الى جيت هذال
لعل عود عقبه للرحامي

في مجلسه تلقا من البن فنجال
وهيل يكثر بالدلال الحشامي

مع حكرة فيها من السمن زلال
ولها من الحيل الجلايل يدامي

حر تزلزل من طويلات الاقذال
نلطم به العدوان شرق وشامي

كم راس شيخ زوله عمد لازال
لاجا لزافات الجموع ادحامي

شيخ يتل الخيل زينات الاذيال
يبري لها عبد كبير الهوامي

خيل زهاها اللبس والجوخ والشال
وربع يروون الحداب الحيامي

نبيه للراس المصعفق اليا مال
لا سيقة العطفه نهار الزحامي

اما لنسل مضيم وافين الافعال
ولا لعلوى اهل الجموع الزوامي

ان شاف نشر عداه نوه بالاجمال
رفرف بجنحانه وكسر وحامي

كم هجمة يقطع عليها اشهب اللال
هجمة حريب دونه الليل زامي

قلط شبوره واول الفى مامال
راحوا عجال وعودوا باغتنامي

واصبح يعزلها مبندق وخيال
والنشر الادني قنعوه العسامي

وله اليا يبسن الارياق محوال
بالمارتين اللي تصيب المرامي

ويا نجد والله ما نبيعك بالابدال
يامرتع الشقحا ردوم السنامي

يا نجد ياما راح فيك من الاجيال
وياما غدي بك من رجال وجهامي

يا نجد لاترهب من الحرب لو طال
ترى شراع الحرب ما ساع قامي

ابشر بجيش وخيل وسلاح ورجال
صفر وحمر مثل لون التهامي

يا ما قطعنا فيك من راس خيال
لا ثار عج مغبرات العسامي

باكر الى علك من المزن همال
وشفت الزهر كاسٍ الخشوم العدامي

اما تحدرنا من العرض وشمال
والا علينا للطلايع ملامي

مثل النهار اللي غطا هضبة الضال
فيه الدويش(1) وفيه ولد الامامي(2)

ولدوا على خشم القهب شيلها مال
ناخذ عمار مجربين الاسامي

يابو جهز ياعز من ضده الجال
امشي على الرجلين مثل النظامي

يا شيخ ابالي حرة ترمل ارمال
مكسوبة من مال قوم قيـامـي


المعاني :
(1) الدويش : سلطان الدويش
(2) ولد الامامي : عبدالرحمن بن فيصل بن تركي بن عبدالله بن سعود