قصيدة(1) : للشاعر عبدالمعين بن عقل بن ثعلي الروقي العتيبي (من معلقاته)

[ابن نجد]

قصيدة للشاعر عبدالمعين بن عقل بن ثعلي الروقي العتيبي، حيث كان بدوي عنده ابل ومع البدو ويحيل وليا جاء الربيع يذهب طلبا للمرعى لحلاله , وبعد مده باع الابل وسوى له مزرعه في ديرته المحاني في شمال الطائف ، وبعد ان طاح الوسم وجاء الربيع راحت الناس التي حوله وخلته في مكانه عند مزرعته بين ابنائه وبعض الحلال القليل عنده ، فضاق خلقه وتذكر البادية وحياة الربيع والصيد وبنات البادية فتهيض وقال :

لضاق صدري قلت يا قاسمت خير
سج القدم يمشي على غير داعي

عديت بالعالي بعالي النواضير
وافرح ليا شفته على الحزم اشاعي

وانا مغير مولع القلب يا بدير
اشري وابيع مشترايه وباعي

والله مغير اصخر القاف تصخير
تصخير مادوب العصا لين طاعي

ومن دق به مثلي هجوس وحواشير
يضيق به لو الطريق اتساعي

امقابلن خضر الودايا المهاجير
على حفافن بين حره وقاعي

والله لو ان الغرس والقصر والبير
يمشي على مافي هوايه وناعي

لشد وانزل في مرب الخواوير
وامشي مع الحزم الفساح والوساعي

عن ديرتن فيها تدب الجعارير
فيها الدجاج وماشبه له يعاعي

غربن من النفره شمال المخاضير
شرقن من الفيضه شمال الكراعي

ياويل مرباعن بهاك النهابير
وياوي شرفانن بها القلب ياعي

اللي بها شمر البيوت الدواوير
شمر البيوت مثولثات الرباعي

بأطرافها كنها قصابة بزازير
يفرح بها الطرقي ليضرم وجاعي

واهل بيوتن متيهيـيـن المعاشير
ألـد روق أهل الطعـون الوساعي

اللي ابهم شقح البكار المغاتير
ترعا بهم بالخوف من غير راعي

اللي ابهم شقر البني الغنادير
شقر القرون لكل قلبن ولاعي

اخذت معهم مطيع ومشاوير
فترة جهل يوم الهلع والدلاعي

واقفيت عن هدفاي ركب المعايير
واخذت من تالي المحطه وداعي

الا بحب اللي بناري مناحير
صفرن على جال المناره مقاعي

يازين شبت نارها للمسايير
لجالهم عندي عليها اجتماعي

اخذ بها زين الحياة التعابير
ولو انها ماغير عب ومتاعي

واسند عليهم في ليال المعاسير
ويروح شبر في محطة ذراعي

ولا كل طيرن يتقلد على طير
ولا كل من هام الشجاعه شجاعي

ولا ينتقلد بالحرار العصافير
ولاينتقلد بالقرمب الافاعي

لو قلدوا قيس على غير تغيير
ولايتقلد بالطبيـعي صنـاعي

-------------------------------------------------------------------
زماننا غير زمانهم وحتى نتذكر الاولين
اخوكم / ابن نجد