السلام عليكم ورحمة الله وبركاته
هذه القصيدة التي تشرفت بألقائها فالامسية التي اقمتها في حفل تخرج ظباط قبيلة عتيبة من كلية الحرس والوطني في العاصمة الرياض يوم الاربعاء19/6/1431هـ مع الشعراء الكبار شعراء المليون نايف بن عرويل^ وملفي بن عون ^ونايف معلا.
اتمنى ان تنال على رضاكم واستحسانكم,,
بإسم من نزل التوراة والانجيل والقران=على رسلة وخاتمهم شفيع الناس يوم الدين
بإسم من تحت حكمة يخضع المامور والسلطان=وتحت أمره خلقنا للعبادة من تراب وطين
بإسم ذات الانافة والكبر بإسم الله الرحمن=بدا قولي وأنا عن لازمي ماني قصير يدين
أنا والحمد لله شاعرن يثبت على الميدان=مثل مايثبتون أهل العزاوي فالنهار الشين
كتبت الشعر فأهله ماكتبته لجل مال فلان=ولاغروني الشعار والنقاد والغاوين
أخذته عشق واستوطن فصدرن هايم وطربان=ولا ابغى من وراه الا الجماله والمقام الزين
ابيه ينومس ربوعي ابيه يدله الظيفان=ابيه الي ليامني دعيته يوفي الوافين
قسم بالله ماعنيت خيلي جايع وعطشان=ولاجيت الرياض اشكي من صدوف الفقر والدين
لاوالله جيت في لازم ولي مقصد وأنا عجلان=عسى ربي يجملني يابن جامع مع الجمعين
حضرت اشارك بحفلن ينومس ربعي العتبان=حفل من وصلوا نجوم المعزة وأصعدوا مقفين
حفل تخريج ظباط القبيلة شلوة الفرسان=نسل من حازو امجاد الفخر بالسيف ابو حدين
شغاميم العيال ألي لهم وقفة وصيت وشان=مثل جدانهم وابوانهم بالطيب ومسمين
اهنيهم وأزف ألهم من الوجدان للوجدان=تهاني عزوتن من ساسهم بالطالة مضرين
تهاني مسقمين الضد ييوم الحرب والاكوان=صناديد الرجال ألي تقف وتطوع العاصين
عتيبة!! وأن بغيت امدح عتيبة تشهد العدوان=قبل مايشهدون اصحابنا الوافين والغالين
عتيبة!! وان ذكرت اطرف مزاياهم مع القيفان=تشوش الروس والتاريخ يخضع والفروق تبين
طحاطيح القروم ألي ليا ثاروا كما البركان=قويين العزوم ألي حماهم مثل سور الصين
كريمين السبال ألي عطاهم كنه الهتان=حميدين الخصال ألي ذراهم يحمي التالين
اكابر نجد وأهل المجد وأهل الخيل والذيدان=وأهل عرف وشعر وسلوم وختوم وهلا واهلين
يطول المدح فعتيبة وياقف وقفة الشجعان=مثل وقفة فهد والا مثل وقفة صلاح الدين
بدون قصور فالعربان والا شكة ونقصان=حشى لله كلن له فعوله فالعسر واللين
مشينا فالدروب اصحاب لابالله ربع واخون=تحت ظل الشعار ألي رموزه نخلة وسيفين
شعار الدولة ألي ماحمها طاغي وخوان=تعاقبها ملوكن تفتخر في خدمة البيتين
عيال معزي ألي في زمانه وحد الشتان=وكون دولتن عظمى على راية بدر وحنين
حكمها من ظلاعين الحديثه لاجبل دخان=ومات وبقية الدولة على الطالة ليا ذلحين
فظل عياله ألي فعلهم يرجح به الميزان=ملوكن عهدهم فأرقابنا مادامنا حيين
فظل اخوان نورة ياوطن والله ماتنهان=ولاتسلب حقوقك فالضحى وأهل الوفاء واعين
مادامك في ذراهم لاتشيل الهم والاحزان=ترى من حاول يزعزع كيانك جاهل ومسكين
وش ألي يجبره فالوقت يعرض راسه لشامان=أثر بعض العرب يحرث لموته كنه أم اقرين
تطمن ياوطنا لايهمك بارد الذرعان=تبا تبقى على الطالة مادام اهل الوفاء باقين
وصلى الله وسلم عد مامالت غصون البان=على محمد رسوال شفيع الناس يوم الدين
شعر..ابراهيم الزراقي