عمدة الهيلا مطلوب

[معجب العتيبي]

الأعرابي

مرحبا فالعمده الي لبس ثوب غير ثوبه=شامر فوق الركب ملفت نظر مافيه زيه
صدق اصحابه موزعة الهدايا ولعبوبه=وقالو العمده لباسه قبع وهدوم انكريه

العمــــــدة

البقا للشاعر اللي دوب شاف النور دوبه=ما عرفنا له مقر ولا لقينا له هويه
القناة اللي تبث الزور عن صقر العروبه=ما يصدقها رجال الطيب في نجد العذيه

الأعرابي

الهويه عانها فالجيب ماهي بمحجوبه=ياغريب لابطاقه لك ولالك تابعيه
العبوديه خشير الشرق الاوسط في شعوبه=والشعوب تقدس الحكام والحاكم بليه

العمــــــدة

الطريقي ما تعودنا نفتش في جيوبه=علموه ان الوسم موجود في خد المطيه
هيه ياللي في شمال الدار مدري في جنوبه=اقهر العوبا قبل توخذ على ذمة قضيه

الأعرابي

راح ملجا العامريه قبر لضعوف لجوبه=وبوش لو منها تبرا ذمته ماهي بريه
الزمن غدار لكن ربعك اغدر وغدروبه=والتعصب من سمات اهل الجهل والعنصريه

العمــــــدة

ما علاها دام مالك عندها خاتم خطوبه=والذياب ذياب في مرقاب ماهي ساحليه
من يعاير متقي له في جبل كساب كوبه=يظهر براسه قبل تركي عليه المدفعيه

الأعرابي

ليش كذب مسيلم الكذاب وسجاح الكذوبه=اجهزة كشف الكذب ماتكشفه ويش القضيه
الطغاه الي كلو خير الوطن واستاثروبه=عود قسمين كلن لاهرج يلعن خويه

العمــــــدة

ما ظلمنا حظها ما دامها ماهي حلوبه=سعرها معروف وسط اسواق مكه والحويه
العصا ما تنشقر والبيت طوبه فوق طوبه=يا مفرقة الصفوف اللي تبون الجاهليه

الأعرابي

احسبنه مايجي معهم لكن القوم جوبه=بالريال وبالدلال وبالرضا والمكرهيه
المياه الي تحلا مايجي فيها عذوبه=العذوبه ماء المطر خل المياه المعدنيه

العمــــــدة

الهبايب والبرودة الحراره والرطوبه=ما تغيّر فاللحم والدم دام النفس حيه
لا تطير مع الهواء الغربي ليا نسنس هبوبه=عادته نقل الخفاف وما نقل حمل القويه

الأعرابي

كيف ابا اقنع واحدن قلبه من الراعه سروبه=واحدينن يرفعون اصواتهم ومحانكيه
مانلومك عندك الهم دين وتواجه صعوبه=بينه متعينه لو هي عن الناس مخفيه

العمــــــدة

درع جنبك عد له يا صاحبي عشرين نوبه=لا تولعها من اول ليلً حربً عالميه
كل راعي حب لا درنا الرحا نطحن حبوبه=وان رمينا القوم ما يخطي عيار البندقيه

الأعرابي

درع جنبي واقفن جنب العدا ينفخ ذروبه=أكسب الحسنه ويكتبها مية مليون سيه
من وراهم لاترجا خير مامنهم مثوبه=وهل تصدق لو يقال انه طلع لشمس فيه