سعوودالعصيمي =
هلا يامرحبا ترحيبٍ معطـر مـن الكمبـوود=يابن برجس بعد شفناك وانت ابلبسك الضافي.
وانا بيني وبين حمود من ماض الزمان عهود=عهودٍ من قبل حكم السعود وحكـم الاشرافـي
حموود بن برجس =
يدوم الك البقا في موقع اهل العز واهل الجود=وانا دايم ثيابـي ضافيـه وجـداد ونظافـي
تهرج يالعصيمي والسوالف حبلهـا ممـدود=عسى ربي يجمـل وقفتـك قـدام ميقافـي
سعوودالعصيمي =
زمان العام اشوفك مار معرف حدك المحدود = لكن اليوم بنت وبان لي ماحولك خلافي.
والا ياحمود بيتٍ مايذري عن هبوب النود = تعيّن له زبونٍ وحل في منزالك الدافي.
حموود بن برجس =
زمان العام ولا اليوم ماقدامك الا حمـود=وقد شافك مدام انّك تمنى الصاحب الوافي
يبو طايل تحسب ان الليالي كلبوها سود=بعد بكره تبا تسري على نور القمر حافي
سعوودالعصيمي =
عرفت انك حمود ولاحمود بجاهلٍ فسعـود=لكن الكلمه اللـي قلتهـا قلهـا لقذافـي.
تعبنا معك واتعبت العرب والفوود مامن فود=ولاباقي معك حيلة تولع نـورك الطافـي.
حموود بن برجس =
نعـم فيكـم وحنـا يالعصيمـي ماعـلانـا زود=لكن اصرف ذهب صافي ونصرف لك ذهب صافي
ترانـا بـاول الطرقـه وكمـل باقـي المجهـود=وهاك الوقت لك حق ان سفى من فوقك السافـي
سعوودالعصيمي =
الك سعيٍ حميد ولا شكرت إل سعينا المحمود=تحسب إنّا على شاطي البحر نسعى ونطافي.
عسى ربي يساعدك ويعينك ياوليـد العـود=وحنامعك مازلنـا نشيـل اثقـال وخفافـي.
حموود بن برجس =
وقفت اول زمانك ياسعود الموقف المشهود=ونهار الماقف الغصاب زولك غاب ياكافـي
تقوله وانت هرش ٍ كل يوم موالف ٍ لك ذود=وراك الناس نشّاده وترقى كـل مشرافـي
سعوودالعصيمي =
وقفت اول زماني واخره علمٍ عليه شهوود=واخوك التوم عقب النايفه معـاد ينشافـي.
وردت مع الورود لعد تيماء والصدور ورود=ولاحصلت مثل البيت الابيض بيت عرافـي
حموود بن برجس =
يدور الوقت واللي طول الغيبه عساه يعود=ياطيب اللي على نهج الوفا يوفي ويستافي
الك بكره هنا وهناك الك حقه ولك مفـرود=حلالك يالعصيمي وانت اخويه واختم القافي
« آخـــر الـــمـــشـــاركــــات »
العرض الشجري