أكره كتابة المقدمات قبل القصيدة ولكن للتوضيح :
هذي قصيدة متواضعة ألقيتها في حفل الشيخ : غزاي بن غازي المقاطي
بمناسبة زواج ابنه ’’سامي’’ ...
يا مرحبا يا ضيوف , الله يحييكم=بسم المعازيب حياكم وحياني
وفـّيتوا وتبشرون بمن يوفـّيكم=سوايرٍ سايرة من ماض الازماني
ما يسعف الوقت اسمّيكم باساميكم=يحداني الوقت والقيفان تحداني
واللي بعد , ياهل الحفلة نهنيكم= الله يبارك لكم يا طوال الايماني
يا عزوةٍ مجدكم من فعل اياديكم=والاسم معروف للقاصي وللداني
الطيب والخير فـ أولكم وتاليكم=والفضل لله ماهو لفلان وفلاني
من فعلكم يفجع العدوان طاريكم=ماهو ليا ولّعت شعلة ودخاني
اللي كتبتوه للتاريخ يكفيكم=والفعل يُكتب ويبقى والعمر فاني
وانا ولد عمكم ماني بخافيكم= واللي يباني يعرف اسمي وعنواني
اسرح مساريحكم واسري مساريكم=واحضر مواقيفكم ولساني حصاني
والعين تفرح بكم والقلب يغليكم=يشهد لكم دمي اللي جوف شرياني
من زايد القـَدر مدري وين اوديكم=حطيتكم في محل ابوي واخواني
وافخر وأماري بحاضركم وماضيكم=ومن لامني لو عرفكم جاه ما جاني
حتى القصيدة ليا سويتها فيكم =ابياتها كل بيت ينافس الثاني
وان جبت لي بيت يمدحكم ويثنيكم=أقول في خاطري صح الله لساني
والمدح لن كان ماهو بـ متمثنيكم=والا يروح تعب راعيه مجاني
اما انـّي أتعب واجيب ابيات ترضيكم=والاّ تدوّرني ولا عاد تلقاني
وانا من ايام جاب الخطّ داعيكم=اقول والله لأجي كان الله احياني
وفي ذمتي يا (شجاع)* ان كان ما اجيكم=من البطاقة لأشيل اسم العطياني