الأمير عبدالمحسن بن حشر بن حميد

[ابن حميد]

هذه القصيدة قالها الشاعر الكبير / محمد بن سعيد الذويبي
(شاعر المصيف ) في
الامير عبدالمحسن بن حشر بن حميد يرحمه الله

سلام يابيتـاً منــزه عن العيـب =بيت الشرف بيت الكرم والشجاعة
بيت الشيوخ اللي تعرف المواجيب=رغـم التغير ماتغـير طبـاعـــــه
بيت الحرار مشمرخـات المخاليب =والحر يشمل كل فـج أطلاعــه
بيتاً عليــه من المعـزه هناديــب =رفرف على هـام الثريا شراعــه
المرجله والمجد والعــرف والطيب=نلقاه في غاباً تزاحم سباعـــه
البيت لبن حميـد مـالي مطـاليب=الأ اني اذكر عزتـه وارتفاعــــه
قايد عتيبه مبعديـن المناجيـــب =ماهمهم ضيق المدى واتساعه
هم عزوتي من دون شكـاً ولاريب= يــوم كلاً نجدتــه من ذراعــــه
يرقا ولدهـم فـوق شـم المراقيب=المجد يسري وسط دمه رضاعه
وباقي القبايل مالحقـهم عذاريـب = كلاً تعـزه غايتـــه واندفاعـــه
ذا قيل من رد المثايــل بترتيـب=شاعر وعنده في بحرها إستطاعه
كم شاعراً يخطي وكم شاعر إيصيب=وشعراً بلا معنا قليل استماعــه
من راس أبو نايف سمعنـا التراحيب=ولا نملك الا قول سمعاً وطاعـه
ومن حبنا فيهم على الجهر والغيب=نحسب حساب الوقت ساعه بساعه
وجينا لدار المجـد ريف الاجانيـب=داراً تعــز الاجنبي والجماعـــه
ضيفان حشمه وومـرانا معازيـب=الطيب دايم يزرعونه زراعـــه
وهذي تحيتنا جماعـه واصاحيـب=لو نستطيـع ان ذيعها بالاذاعه
من روسنا ماسطـرت بالمكاتيـب=حب وفا مالي وراها طماعه