بعد قال الطبيب ان السلامه صافحت عيدان الطويل ..!!

[عايض بن زوير]

لن أطيل المقدمه




أبيات أتت هكذا


بمناسبة سلامة الشيخ عيدان الطويل .. !!



فأرجو قبولها كما هي





,,

ولا ياهاجس الليله بعد جا للشعر ميدان=تولم واسرج خيول القصايد وأصلح النيه
أبا أسري بك على نجد العذيه ديرة الفرسان=من ربوع الحجاز اللي تسامت بالفروسيه
وأبا أعنك على درب الوفا ياهاجسي بعنان=ما دام اني مضريها على الروحات والجيه
بعد قال الطبيب ان السلامه صافحت عيدان=بأمر رب السما عالم حوال الشمس والفيه
أبا أغني وأبا أدندن وأبا أنحت فالصخر قيفان=وأبا أهديها لبو تركي صباح العيد عيديه ..!
تماثيلٍ تبا تبقا على درب الوفا عنوان =عناوين الوفا ما هي عناوين الهواويه
تماثيلِ تسلي خاطره في زحمة العربان=يدندنها على نفسه طرب في كل عصريه
عسى قلبك يابو تركي من صدوف الزمن عريان=وعساها في صميم اللي كره شرواك مثنيه
وجع ..حتى ليا منه تنفس يضرب الشريان ..!!=ولا ينفع معه طب الطبيب ونضجة الكيه
وأنا ما قلتها جايع على الطرقه ولا ضميان=غناوي والغني الله ومن ناس غناويه
ولا قلته عشان اليا هرج بي فالقصيد فلان=يقولون العرب : شاعر فصيح لسان ما زيه ..!!
أبعدٌها وأقربها وأقدر لحية الشيبان=وأخص اللي على وجهه ظهر للطيب ماريه
مخاوا الشايب الصايب ذهب ما ينشرى بأثمان=يوم ان أكثر كنوز الأرض مبيوعه ومشريه
ذرانا عن معاصير الزمان ولفة الديبان=سندنا لا كبر خشم الليال وثارت الهيه
وأبو تركي ليا عدوا على سطح الوطن ضلعان=يصيح طويق للعارض يقول : الثانيه ليه !!
صدفته مره ومره وهو في طرقته عجلان=تمنيت الزمن ياخذ لنا من وقته شويه
لحيث انه ليا منه تكلم ياجب السكتان=حكيم الراي وأقواله تقول أمثال مرويه
مواقيفه على وضح النقا تسري بها الركبان=شماليه جنوبيه ..جنوبيه شماليه
ليا منه وقف للمعضلات يرجح الميزان=وليا منه تولاها وطى ع الداب والحيه
أمان الجار لضيوفه أبد ما قطب الحجان=إله ضحكه تفردها وإله صارت خصوصيه
كريم من الكرم لو هو يقلط للعرب قعدان=تهيا له من شعور الطنخ في عينه بليه
ومن وده على شيٍ نعده ياخذ البرهان=ولا يا كثرها روسٍ خلاف البيت مرميه
عجيب الوصف ما نوفي معه لو نكتبه ديوان=وكل اللي سبق ذكره ما غير 2 % ..!!
عسى ربي على شيٍ يضره يصفق البيبان=وعسى قلبه من الراحه يريح البال ليليه
وليا منه حصل ماني على بعض العرب شفقان=أبو تركي سلاماته لنا مليون عيديه ..!1