مرثية في الشيخ ساير بن عنيبــر الجعيد يرحمه الله

[صقر الجعدة]

بسم الله الرحمن الرحيم
قصيدة نبطية من تأليف الشاعر / عيد بن ساير بن عنيبر الجعيد ـــ فى رثاء والده الشيخ ساير بن عنيبر الجعيد ـــ يرحمه الله .. شيخ قبيلة الجعده من عتيبـــة فى 3/7/1416هـــ

يالله يامعبود يامنشي الأمطار=يامطلع في البينة والخفيه
يامدبر كونه وعلام الأسرار=يوم القدر مااحدِ يرد المنيه
إن دارت الدنيا لا بـد الفلك دار=الموت زاده ناس صبح وعشية
بعد الحياة الموت قصاف الأعمار=أحدِ سعيد الروح واحد شقيه
يابوك أنا ياسعود والله محتار =لكن هذى دبرة الرب فيه
سهران ليلي فى هواجيس وأفكار=واليا نوى الله كل حالِ يمضيه
بين العرب قالوا يذيعون الأخبار =رحل عقيد القوم شيخِ شفيه
الشيخ مات وبدل الديره بدار =عساه في منزال خير البريه
ياموت ياليتك مخيرني اخيار=لا رخصت روحى قبل روحه هديه
ياعين لو هليتي الدمع عبار=مثلك تهل الدمع جمع رويه
ياما بكينا عنده اكبار واصغار=ولا نبكى الا عند رجل الحميه
طول الدهر ماانساك ياشيخ الأذكار =مادام قلبي حي والراس حيه
ذكرت ذاك الكيف مع شبة النار=وذيك الدلال الصفر والشاذليه
مرحوم يامن يكرم الضيف والجار=والحق والانصاف للناس يعطيه
مرحوم يامن له معزة ومقدار=ودايم على العليا عرفنا نويه
يوم العرب تنصاه من كل الاقطار=ويحل صعبات العلوم القويه
اليا حضر بين القبايل بمحضار=بالحق ماتصعب عليه القضيه
ان جات زلات الرفاقه بقنطار=يرمي بها فى جم بير هبيه
اليوم ياعائض لك المجد تذكار=ياذخر ابوي اللي تشابه حليه
لاشك ياعائض لك أخوان وأنصار=اليوم يارجال قود السريه
حنا على جنبك لك احصون واستار=امن الدهر والامن أهل الخطيه
الصقر له فى ماقع الصقر مكيار=قول الرجال أهل العقول الوفيه
بالدوم خلك مع طويلين الأشبار =أهل الشيم وأهل السلوم النقيه
من لاستشارك فى مهمات الأقدار=خله يقفى بين حسنه وسيه
الناس فيهم للأجاويد مكار =يحط مع درب الفضيله رديه
فى الناس محتال وفى الناس غدار=ابعد عنه خله بقلعه طميه
أنصحك من صحبة خبيثين الأشرار=أهل النقيلي والعلوم الغبية
وان حدتك دنياك يانسل الأحرار=ربعك على جنبك ثياب ضفيه
رجل بلا ربعه على الضيم صبار=وعليه تقرأ الفاتحه والتحيه
اتبع طريق الحق لا تجنب ايسار=ولاتمشى الا مع ذياب طويله
ياجعل ربي يبعدك كل الأخطار=وتعيش فى دنياك عيشه هنيه
وصلاة ربي كل ماتشع الأنوار=محمد اللي كل مسلم نبيه