بمناسبة حصول العتيبي على لقب ( الخيّال ) في مسابقة فارس الصحراء

[علي فلاح العضياني]

مبروك فوزك يا وليد العتيبي=أنا أشهد إنك صدق ( فارس ) و ( خيّال )
مثّلت ربعك جعل فالك يطيبي=و نومستهم يا طيب الذّكر و الفال
خيّال ما فالعلم شكٍ و ريبي=بالفعل ما جالك بتصويت جوّال
فوق المهار اللي تهاذب هذيبي=و حمولها تقريب 20 رجّال
فعلت فعلٍ ما نعدّه غريبي= و رثته من العمّ و الجدّ و الخال
أصلك من الساس الأصيل العريبي= و ربعك هل الطالات ماضين الأفعال
ربعك عتيبه سقم عين الحريبي=تاريخهم يشهد لفرّيس و أبطال
أقولها والله عليّه رقيبي=( يكفيك ابن هندي و مسلط و هذّال )
دايم لنا فالمجد حظّ و نصيبي=العزّ مطلبنا على مرّ الأجيال
و درب العلا ماهوب هيّن ... صعيبي= والصقر ميقاعه على النايف العال
واللي بفعله زوّد الطيب طيبي=تنشر له البيضاء على راس ما طال
لي الفخر ... و بكلّ صدرٍ رحيبي=أكتب و أغنّي فيه من جزل الأمثال
فيه الهقاوي كلها ما تخيبي= ما دام له في قمّة المجد منزال
شمس الحقيقه نورها ما يغيبي= هذا الصحيح و كلمة الحقّ تنقال
الله يوفّقنا الكلام المصيبي=و إنّه يثبّتنا على خير الأعمال
و صلّوا على وجه الرسول الحبيبي=عداد ما يمطر من الغيث همّال

التوقيع

(( رأس الحكمه مخافة الله ))