أنا أشهد ان الحب فالوقت سنه ,, من سنها...

[عايض بن زوير]

أخواني واعزائي,, أضع بين أيديكم هذه

المتواضعه,, متمنيا

أن تنال

الاعجاب والرضى,,

هات القلم ياحمود والبوك دنه=دنه عداك الهم يانسل الأحرار
وأجلب لنا سمر الشمالي وقنه=فأرض خلا ماحط في موقد وجار
وأشعل لنا ضو ليا شاع كنه=شمس,, تذرى فيه طرقي ومرار
وأحمس لنا من غالي الكيف بنه=برية تجلي عمس خاطر"ن" حار
والنجر دن النجر ياحمود دنه=دنن يسلي من تجاذبه الأفكار
وبيت على المرحوم بالصوت غنه=(ياما حلى ياعبيد في وقت الأسفار)
وقرب من الرسلان روس الأعنه=صفر"ن" علاها من تواصيف الأمهار
ثم عطني الفنجال,, وان قلت ثنه=ثنه عسى يفداك من يوذي الجار
ومن بعدها ياحمود من غير منه=أقرب وأنا بعطيك تفصيل الأخبار
أقرب وأنا بعطيك علم"ن" مكنه=أبا أكشفه ذا الليل,, لو صار ما صار
أبا أكشفه فالحال.. فالحال لنه=عيني ثلاث ليال عنها الكرى طار
وان قلت في جنه تراني في جنه=وان قلت لي في نار قلت الك في نار
وان قلت لي ذا الحال ياويش منه=قلت البلى مزيون ,,قفى عن الدار
غرو "ن" نحيل القد يادوب سنه=سبعة عشر.. مدري يقلن الأعمار
فيه الحلى والزين عال"ن" مجنه=وفيه الثلاث اللي يبيحن الأسرار
عين ردي الحظ من سلهمنه=والمبسم الوخاذ معسول الأدرار
وثالثهم اللي فالحلى يفرقنه=غمازتينن شغلهن لفت الأنظار
والعود عود الموز ماخالفنه=في اقبالها.. والموت في حال الادبار
وكن الهبايب لا مشى يطرقنه=في مشيته مضمون غنج وتمختار
ولولا العلوم اللي ورى ثقلنه=كان الهوى لا هب.. مع يمته سار
وتفاحتين"ن" عالنحر زيننه=في مثلهن ماشيف زين وتدوار
وليل على متنه سرى في مضنه=لحاف لأهل العشق ولحاله خمار
وسوالف"ن" زود حلاها بغنه=من سمعها يمناه يفرك بها يسار
والله ولا حزة ضحك لي بسنه=وأقفى ودمع العين عالخد مدرار
أقفى وراع الشوق تصلاه ونه=لو ونها سنجار ما طال سنجار
العام عيني والمشاعر يجنه=واليوم ما غير أتسلى بالأشعار
أنا أشهد ان الحب فالوقت سنه=من سنها محفوف بأنواع الأخطار
وراعيه في قلبه سهوم"ن" مسنه=وان ما رحمه الله.. علاه الفلك دار
ودام الهوى ياحمود حرب"ن" مشنه=أتكل على الله من صواديف الأقدار