تحيون ياعتيبه على مـر العصـور

[عبد الله الحليفي]

السلام عليكم ورحمة الله وبركاته

اسمحولي ان اضع لكم هذه القصيده اللتي تشرفت بإلقاءها الأسبوع الماضي في حفل أبناء قبيلة عتيبه في سباق مزايين الأبل بمنطقة تبوك وذلك لإشتراك بعض أبناء القبيله في مزايين الأبل بمنطقة تبوك وكان من واجبنا الوقوف معهم وهذا اقل مانقوم به

يامرحبا ترحيب ماقف عز والقـاف معمـور=بالعود الازرق عامره والنـار مـن شبابهـا
ترحيبةٍ يفوح منها الهيـل وتفـوح الزهـور=يوم ابتديها مـن طنـاخة راس مـن غنابهـا
ياقاف الك ميعاد في ماقف طويليـن الشبـور=اهل الفعول اللي على العليا تسـوق ركابهـا
مواطن التقوى هل الطاله مذاخيـر الصقـور=اهل الفخر يوم السنيـن الجايـره وانشابهـا
واهل الجهامه متعبين الخيل من ماض العصور=واهل المكارم في رسول الله تعـود انسابهـا
ماضي وحاضر ماتغير لـو يشحّـن الدهـور=اعتيبـه الهيـلا حـزام النايبـه واصحابهـا
واهل السيوف الساطيات اللي يفجّـن النحـور=يوم الليال السـود لقّـح ماختلـف مضرابهـا
كم شيخ قومٍ فاللقـا خلـوه لقمـه للنسـور=وكم خايفٍ يمسي تحت عز اللحـى واشنابهـا
يوم السنين وغيّها في نجـد مامـرت مـرور=بانـت مواقفهـا ودقـت بالفعـول اطنابـهـا
اي والله امدح لابتي والمـدح فيهـم مايبـور=ومن مد نص الكـف ردينـا عليـه اكرابهـا
هذا من الماضي وفالحاضر هل الطاله حضور=في ملتقى الهيلا فـروق الفعـل فكـت بابهـا
زادت وطالـت والقبايـل مانلحقهـا القصـور=كـلٍ بفعلـه حجتـه بيـن العـرب يسعابهـا
واليوم في حكم السعود جبـال حـقٍ ماتمـور=بالشرع سادت واهل مكه يعرفـون اشعابهـا
واختامها تحيون ياعتيبه على مـر العصـور=ماهمنا شهـب السبـاع اللـي تحـد أنيابهـا