يامن على زين المثايل تحرصون

[مجول بن جلال المقاطي]

يامن على زين المثايل تحرصون = واسماعكم تهوى العلوم السنيعه
تسمعولي جعلكم ماتهونون = واخذوا تماثيل الطروق البديعه
اخذوا كلامٍ عن خفا الحال موزون= لو مانحكمه قدمكم مانذيعه
شفنا بها الدنيا مثل ماتشوفون = عجايبٍ منها تشيب الرضيعه
الناس عوًد حالها دون في دون = في صفهم بان الخلل والهزيعه
وان جيت تاصف حالهم قول مضمون = ياقل منهو محتفظ بالطليعه
ويامكثر اللي في رضا الله يمالون = نفوسهم لرضاه ماهي مطيعه
يوم الامه في المساجد ينادون = اصواتهم وسط المنابر رفيعه
شف في صلاة الفجر كم المصلون = اللي خطاهم للمساجد سريعه
والله لتونس داخل الكبد طاعون = لاشفت وش كبرالبلاء والفجيعه
كيف الكثير عن امر من كون الكون = يفضلون النوم جنب الضجيعه
مدري متى من غفلة النفس يصحون = قبل عليهم يطبق الموت ريعه
وشفنا البشر مابين فاتن ومفتون = وكلن على المكسب عزومه بتيعه
ومن بينهم يامكثر اللي يرابون = الهم بسحت المال شريه وبيعه
من الوعيد المعتبر مايخافون = ماكنهم في بلاد حكم الشريعه
وشفنا الامانه خانها كف مامون = من عقب ماهي في يدينه وديعه
وشفنا هل الرشوه وشفنا المراشون = وياكثر من يمشي بهاك الصنيعه
لذممهم برخص العموله يبيعون = وشلون مسلم دم وجهه يبيعه
ماكنهم عن حكم الاسلام يدرون = في قول من عباد الامه تبيعه
المرتشي والله يراشيه ملعون = والله من قو الغضب والوقيعه
وشفنا هل الارحام ماعاد يصلون = من بينهم شفنا الهجر والقطيعه
وشلون لحقوق القريب يتناسون = وقلوبهم على بعضها وجيعه
وشفنا الكثير برايج الهرج يمشون = وكلن يقول ومتخذله ذريعه
ولابذنا ياكود قولت يقولون = وقولٍ بدون اثبات يسقط جميعه
وشفنا بمجالسنا مثل ماتراعون = طبيعةٍ ياقشرها من طبيعه
بين الكبار صغير السن ملسون = ويزعجك في المجلس بكثرة لعيعه
وشفنا الاخوه قدرها صابه الهون = تهاونوه اهل الحيًل والخديعه
ناسٍ مع الاصحاب ماعاد يوفون = سلم الوفاء والطيب ماتستطيعه
والصاحب اللي صحبته ضحكة سنون = مثل السراب اللي يخدعك لميعه
واخير من ممشآ مع النذل والدون = ممشآ لحالك بالفجوج الوسيعه