مصلح بن عياد ومحمد السناني الروس ما يتعب الحلاق تحليقها...

[بدر الشلوي]

مصلح بن عياد=
سلام والملعبه فيها فرح وأنشراح=من زين موضوعها زانت طواريقها
عز الله أني عرفت أهل القلوب الصحاح=في كل ساعه تجدد لي مواثيقها
محمد السناني=
يا مرحبا والمكان يزوّد الأرتياح=والناس تطلب من المولى توافيقها
لو كان تسمع دعاهم فالمساء والصباح=كل المطاليب ما يتعبك تحقيقها
مصلح بن عياد=
من طيبكم ما سمعنا في طرفكم صياح=امعلقين النيامس في معاليقها
يضفي عليكم جناح ويحترمكم جناح=واللي بقي من جواهر في صناديقها
محمد السناني=
الجيل الأول تعب فالمعركه والكفاح=واليوم صف الجماعه صعب تفريقها
أليا سمعنا الكلام اللي يداوي الجراح=يهمنا مصدر الكلمه وتصديقها
مصلح بن عياد=
يوم أنها للخناجر والقنا والرماح=ما همنا ساعة الدينا ولا ضيقها
الجيّد اللي قطع راس الصنم لين طاح=وأنا أعرف العلم والاصنام ما أطيقها
محمد السناني=
واليوم فالعولمه والعلم والأنفتاح=قدرتك ماهي كما كان الك تطبيقها
ماهي على كيفنا تمشي هبوب الرياح=وآلا نبا نبدي الريعان ونويقها
مصلح بن عياد=
أدعي لكم بالهدى والمرجله والصلاح=وأليا ضميتوا هذي زمزم وأباريقها
لا تقدحون الزنود ولا يثور الملاح=وأشب في عودها وأزيد تحريقها
محمد السناني=
دعوتك ماهي بزايدةٍ طريق النجاح=لابد يطلع لها مشروع ويعيقها
ذوب العسل لا تخلطونه بسمٍ ذحاح=والناس عطشا وباقيةٍ على ريقها
مصلح بن عياد=
تطرد ورى الحظ مار الحظ قفى وراح=ما قبلك من الجبال آلا شواهيقها
صبّحت بالخير يا وجهٍ تحب الصباح=الله يعينك على الجوخه وتبنيقها
محمد السناني=
كلمتك هذي وعد وآلا لكبح الجماح=بعض المعادن يغش العين تبريقها
صبّحت بالخير لا نادى منادي الفلاح=كان الجميل يقدر الحملات ويطيقها
مصلح بن عياد=
الكلمه اللي نصدرها عليها وشاح=عليك تنفيذها ما هو بتدقيقها
خلك بطل لا تليمها حرام ومباح=لا تتبع الروح تلحقها لواحيقها
محمد السناني=
ياما سمعنا التهدد والوعد والصياح=والناس نسمع على الاحداث تعليقها
أن كان لا أنته ولا أنا ما طلبنا السماح=الروس ما يتعب الحلاّق تحليقها