صح لسانك يابو مطلق وحبيت أنقلها هنا بعد أذنك
في البداية نذكر المعبود علام السريره=في لسان المؤمن أحلى من قراهيد القراحي
يا إلهي يا مدير الكون من غيرك مديره=يا الله التوفيق في التوثيق يوم الشعر فاحي
ياسلام الله على شيخاً من شيوخ الجزيره=يوم ضربات السيوف ويوم زرقات الرماحي
يشهد المحدار من دار الحجاز أرسل نذيره=قبل يبغاها سماح ولا حصل منهم سماحي
أعتزى تركي وسل السيف من داخل جفيره=لين أخذها بالهجاد ولين اخذها بالصباحي
الزعيم الي خذا في نجد للعتبان ديره=قام حظه يوم حظ الخصم في المحدار طاحي
تركي بن حميد مقدام العرب شيخ العشيره=ماخذاها كود بالموت الحمر خشم السلاحي
تركي بن حميد في نجد العذيه شب نيره=و احتماها يشهد التاريخ في كل النواحي
وقومه الهيلا اليا جات المواقيف العسيره=في الجنوب الشر زاحي في الشمال الشر زاحي
كم عدواً في نهار الكون حاس الله مريره=من قويين العزوم ومن بعيدين المشاحي
من طمع بعتيبه الهيلا تراه عما بصيره=أستقروا في قرارت نجد مرتع اللقاحي
أستقروا في قرارت نجد بسيوفاً شطيره=من يناحيهم يبى يتعب ولا يقدر يناحي
القبايل تجتمع ضده و يكسرها كسيره=علموني بيرق الشيخ بن هادي وين راحي
عقب ماهو في قرارت نجد قفابه بعيره=من ورى صبحا يصيح ومن ورى الحصاه صاحي
بعد تركي جاك ابن شبنان و كمل في مسيره=عزوتن ياوي عزوه مايفارقها الفلاحي
يوم أخذ موجا ومبلش حان قتله في المغيره=للصديق اكبر معين وللعدو سم ذحاحي
و لا نسيت الشيخ بن هندي مواقيفه كبيره=في الرحى ينشاف سيفه مثل برقاً يوم لاحي
والسطامي ما يلامي راح نصفه فوق عيره=و الأمير اللي غزابه قال لا عاده مَراحي
ابن هندي يوم هدى هجت شريره=مايبون الا السلامه يوم دم الشيخ ساحي
شيخنا مقدام قومه في الصعيبات الخطيره=يوم عرجا يشهدن حتى نسانيس الرياحي
وانتبه ظيف الله العفار مايشبه لْغيره=يوم خصمه صار مثل الطير مكسور الجناحي
يتمنى شوفت العفار والمده قصيره=كم عقيداً حط راسه حفرتاً وسط البراحي
في زماناً يقدم الرجال واللي ذل عيره=يوم كلاً من زناده زندهم يقدح قداحي
وعمك ابن بجاد قاد الجيش بسلاح وذخيره=في الفتوحات الكبيره يوم نور العلم ضاحى
وجدكم جهجاه ماينسى له فعولاً بريره=جمد الفتنه يا بوسلطان بسلوب ونجاحي
الشجاعه من طبوعه والايمان داخل ضميره=وطاعة الامام واجب كود شيءً مايباحي
وعمكم سلطان بن جهجاه فزعاته كثيره=يبذل المجهود في المحمود شيخ الشمل صاحي
وشيخنا نايف بن جهجاه له نظره خبيره=مدحكم ياشيوخنا من فوقنا مثل الوشاحي
الله انه يرحم اللي راح والدنيا ضريره=يامحبين السلام و يامداوين الجراحي
وشيخنا فيصل ولد سلطان له في العلم سيره=شيخ شمل و وقفت الأمير مافيها مزاحي
وشيخنا جهجاه بن نايف عسى في الأمر خيره=الشجاعه والزعامه والكرامه والصلاحي
بارك الله في بلد عروى وسكانه وأميره=ديرتاً ماتنسى يااهل القلوب اللي صحاحي
ديرة الاد الكريزي يوم دق الحرب زيره=عزوتاً ماتوخذ اباعرهم بوسط المراحي
والله أنا مامدحنا صاحب اليمنى القصيره=مامدحنا الا شيوخاً يستحقون المداحي
آختامها صلوا على المختار يالوجيه السفيره=عد مادن الرعد وعداد برقاً يوم لاحي