سنة الغاب

[عثمان الثبيتي]

ياصاحبي لا تلحق اللوم بعتاب = وانا زماني شق صدري بسيفه
دامك معي من سطوة الوقت منصاب = لاتعاتب المجروح وانته رديفه
انته وانا في عصرنا مثل الاغراب = نمشي مع الشارع ونكره رصيفه
نفرح ونستبشر مع الوقت لاطاب = ونضيق لا صارت همومه كليفه
تسوقنا القسمه مع دروب الاسباب= على جحافيل الظلام المخيفه
اثر الامل كذاب والوقت كذاب = والناس كذابين منهم نصيفه
صدق اخدعتنا ضكة السن ياعقاب = ولا غرنا غير النوايا العفيفه
بمعاديً متلبسً ثوب الاحباب =نذلاً يغش اهل القلوب النظيفه
الغدر شايع وانتشر بين الاصحاب = حتى الحليف اليوم باق بحليفه
عصراً مضى نفدا بعضنا بالارقاب =والقصد سامي والمبادي شريفه
والبوم نصابً يجامل لنصاب =مخادعً غر الخلايق بزيفه
تسودنا في هالزمن سنة الغاب = المجتمع ياكل قويه ضعيفه
كانك فقير يصك في وجهك الباب = وكانك غني تقلط على اعز ضيفه
وقت الغناء الفاحش طغاء فوق الانساب = واطفاء وهج راع السيوف الرهيفه
يرفع مقام اشناب ويطمن اشناب = ويطمع الخادم بعرش الخليفه
يعني يذل الروس ويعز الاذناب =ضفاء براده فوق لاهوب صيفه
حتى الصقر وقع على وكره غراب = بالساميات الطايلات المنيفه

التوقيع

انكان طاب الوقت وانكان ماطاب=مايختلف نهج الشجيع وطموحه اما اقبلوني هكذا سلب وايجاب = والا ودعاً والعذر والسموحه اذا انقفل باب انفتح غيره ابواب = وكلً على ما قالوا ادرى بروحه