العريفي الخالدي والشيخ هذال بن فهيد اخو هملا

[ابودريع]

بسم الله الرحمن الرحيم

مقدمه :::::::::::::

هذه السالفه نسمع بها مع الشيبان الاولين ، طبعاً العرافا والشيابين اخلطاء( بالحلال) والعرافا عدايلهم مع عتيبه وغيرها من القبائل والشيابيين خاصه مع عتيبه ، ومن اول اذا بغت بعض القبايل تنقل عامودها ومعها نقولً واجد تحط( الوضيع) عند اهل (مزعل) العرافا من بني خالد والوضيع اما تمر زايد او اي اغراض زايده تثقل عليهم.

ويروى لنا ان الشيخ هذال ابن فهيد صوب في احدى معاركه وجاء الخبر في سوق مزعل والا عبدالعزيز ابن سعيدان العريفي معجبه هذال وفعوله من شجاعه وكرم و ماوده ان يموت مثل ها الرجال فقال : من يبشرني ان هذال طيب واعشي الحاضرين ، وما جاء من باكر الا والعلم واصل انه مصوب ومفضوضه رجله ، قال : الحمدالله ياربي ، واذبح لهم هاك الطلي .

مرت الايام وراحوا العرافا لخلطاهم يشفون حلالهم من ابل وغنم عند القبايل ، وراح عبدالعزيز مع ربعً له لشيابين ، ونوخو ركايبهم وجوك مقبلين عليهم ، قلطوهم الشيابيين وحلبو لهم ، شرب عبدالعزيز ولا كثر وراحت السحله ولاعاد عودت ، وهم حول المغرب ، فقال واحد معه ها ياعبدالعزيز يا خسارة ذبيحتك فا الرجال ، قال : لا والله لو انه حاضر كان شفت فعله، وهذال ابن فهيد مهوب فيه وواصله علم بفعل العريفي في سوق مزعل ، يوم هجدهم في الليل وشف ها الركايب المنوخه درا انها للعرافا ، فصوت لواحد من عياله قال ويش عشيت ضيفانا ؟؟ قال : تغبقوا وقلت بكره اذا جيت نتغدى معهم ، قال جعل الي عطانيك ياخذك ، هذولا العرافا يوم اني صوبت وتعافيت ذبحوا عشان سلامتي ، قم ووقض اهل بيته وزينو لهم العشاء ورحب بهم وهلابهم وتعلل معهم ثم خلاهم يمسون ، والا عبدالعزيز جنب خويه قال : شفت فعله اذا حضر .

وايضا سعود ابن سعيد العريفي كان من المعجبين بفعول هذال ابن فهيد ، وتعرف عليه وعزمه ، وسمى بنته هملا على اخت هذال وحط له (قربه ) سبيل في مسجد (مزعل )

هذا شيء من الي سمعناه من شيبانا عن هذال بن فهيد الله يرحمه

آخر تعديل ابودريع يوم 15-Sep-2011 في 02:49 PM.