قصيدة في من يسب بنات الريح ( الخيل ) وقليل في حقهم

[(محمد الدلبحي)]

السلام عليكم ورحمة الله وبركاته

القصيدة تخص اشخاصً ما واسأل الله ان تحوز على رضاكم

قم يا نديبي واتجه لبو عبدون = بالحال دق السلف والجيب تله
وليا ستوا ممشاك حذرا من الهون = خلك عجل والقرم تاصل محله
جيبك جديد وتاير الجيب بالون = والفل الابشن ما يجي فيه خله
مجهام يا دريول على ما يقولون = في ثلثه التالي ودربك تدله
ومن يم سعد وخلق ربي يصلون = وقف وقبل ثم كبر وصله
وليا وصلت العاصمة قبل يمشون = الي وراه اشغال صفة وعله
تلقاه طربانن يلاحي على لحون = وتلقاه قد زين من الكيف دله
وقله محمد شاورك يزعم الكون = وارجع وقله ثم قله وقله
قله لقاله شلة ن دون في دون = رخوم ما تملك من الطيب لله
ذمو بنات الريح من كل مكنون = والي يذم الخيل ربك يذله
هذي بنات الريح يا الي تسبون = لا جن سبايا ن يطرقن الاجله
تسوا كنوز الارض والي يخزنون= وتسوا فضا هالكون يا هيه كله
والسيف في يمناي للحرب مسنون = ومن فوقهم يا هيه لازم نسله
والله لاقالبهم مثل فعل شارون = الكافر الي ماش مذهب ومله
والعون ربي وانت عقب الله العون = ولا يبطي المرسال خله يتله