وحدةٍ نفتديها

[أبو عبد الملك الرويس]

بسم الله الرحمن الرحيم


وحدةٍ نفتديها
( يا بلاد العزّ )

يا بلاد العزّ ما نسْمَعْ وكيد = كلْمة الخاينْ ولا راي الحسود
دولة التوحيِد وابْدًا ما تبِيد = باذْن ربٍّ نعبده ركّعْ سجود
دولةٍ قامتْ على نهْج رِشِيد = شِرْعة المختار درٍّ معْ ورود
به رضينا ما حيينا ما نِحِيد = عن طريق الحقّ نبْقَى للحود
ومن طمَعْ فيها تَرَى عمْره فِقيد = دونَها الاحْرار في الهيجا أسود
ما تهاب الموت مِن قلْبٍ حديد = ما تذيب النار صِلْبه بالوقود
عَزْمها مع اللظَى دايمْ يزِيد = وتبْتسم للموت لا جالهْ رُعود
لو تقِيسهْ بالبَحَرْ فاقه بِعِيد = ولو تِعِدّه فاق رَمْلٍ في النفود
ومِن سَعَى في الشرّ معْ راي البلِيد = وينَفخ المقرود في نار الحقود
نلْجِمهْ بالحق والسيف الحديد = ونلْزِمه يَمْشي على رسْم الحُدود
وحْدةٍ فِي اظْلالها عيشٍ رغِيد = نفْتِديها بالنفايسْ والنقود
وحدةٍ مَسْقيَّها دمّ الورِيد = نفْتديها بالوَلَدْ مع الجُدود

أبو عبد الملك الرويس
4 / 4 / 1432هـ