سفر الدغيلبي وملفي المورقي

[المثالي]

ملفي المورقي




الليله المعنى يزيد جروح ويداوي جروح
ظني يزود جروح وجروح ٍ يقوم بطبها
يا ناس نادوا لي سفر يا قف هنيا لا يروح
اما يطفي النار والا يحتزم ويشبها




سفر الدغيلبي



الليله الطاروق من برقا لمزحم والطلوح
مال الطواريق الصعيبه غير من يلعبها
عندي شهود الشرع يا ملفي ولا فيهم قدوح
توفي الماجوب وتصلي وتعبد ربها



ملفي المورقي




علومنا وعلومكم ما هيب جسم بدون بروح
ومن الثقه ما همنا مدح العباد وسبها
خابرك قبل اسبوع يوم تخيل براق ٍ يلوح
في مزنة ٍ تبرق وترعد والثعول تصبها




سفر الدغيلبي



هاذا خلك مع الناجين من طوفان نوح
دامك عدوٍ للمخاطر والنجاه تحبها
عندي ثقه و اعامل الاصحاب بالقلب النصوح
وامشي لحالي والجحاره دابها مع ضبها




ملفي المورقي




الموج طامي والسفينه فككوها لوح لوح
والظاهر النجار ابو مسمار راح وكبها
مالك ومال الشجره اللي لا غبوق ولا صبوح
اليا لهبها لا هب الجوزاء تساقط حبها




سفر الدغيلبي




اليا اصبحت نار ٍ تذيب الصخر وقدور ٍ تفوح
تنشب بها الجهال والعقال ما تنشب بها
ما دام معي السيف ابو حدين وحصاني جموح
بغزي على صهوة حصاني والسيوف اضربها




ملفي المورقي




حنا نعرف الناس ونعرف الصمايل والمزوح
واللي يدور للماشكل حطته في عبها
الناس مثلك يا سفر كل ٍ واله راي وطموح
والناس ما تشري السيوف الصارمه تنصبها


سفر الدغيلبي




ضحكت لنا الدنيا وعمرنا على القمه صروح
نبى نعز الروس دام ان الهبوب تهبها