محمد رشيد
ياسلام الله على اهل الطيب عربين المجاني=قلتها مرّه واكررها ثمانين الف مره !
كل ماحصلت عبدالله تذكّرت المحاني=والمحاني وادي ٍ مابين سهل وبين حره
عبدالله الاصعر
مرحبا ترحيب من قلبي يترجم به لساني=والرفيق اللي سلامه زوّده لله دره
كل ماحصلتني تذكر طويلين اليماني=والمحاني دونه الضلعان ماتقدر تمره
محمد رشيد
البقا والعلم الاول جاء بداله علم ثاني=ودي اعلمك ابه لكن صرّ العلم صرّه !
القمر غطا على الجدي وعلى اسهيل اليماني=كل ماشعشع بنوره غابت نجوم المجرّه
عبدالله الاصعر
يامغيّر علمك اثرك صار وضعك قلباني=كيف ابا اخذ علمك ونيتك ماهي مستقرّه
القمر يبدي لكن يغيب في تال الزماني=والجدي على ممر الوقت ثابت في مقرّه
محمد رشيد
ماتغير نيتي واختار في جزل المعاني=وانت ابن عمي وابن عمي مبا علم ٍ يضره !!
من زرع له بر مايحصد يالاصعر برتكاني=طيعني مالك ومال اللي بذر حبه وبرّه !!
عبدالله الاصعر
صاحبي في رهاط جالس يصهل صهيل الحصاني=مايسوي خير للناس او لا يكف الناس شرّه
علّم بعلمك هذا فنّ التحيتي والسماني=مالهم عند العضياني ترى مقثال ذرّه
محمد رشيد
قلت اباسولف وابا امزح معك واثرك ماتداني=واكثر العالم من الضيقه زراره مايزرّه !
كنت اضن بضن فيك وعودت عشرك ثماني=مير مع ربعك وجيرانك تحرّص لاتشرّه !
عبدالله الاصعر
قلت تمزح يوم ماعندك على الحجه ضماني=والخطاء عليك ثابت والشقى حبله تجرّه
يامحمد طيعني لاتهدم عزاز المباني=انت اشوفك في طريق الشر الك مدهل وجرّه
محمد رشيد
ان بغيت الصدق ماعديتك الا من خواني=مير خلك منتبه لاحطك الله في مغرّه !!
لو حفظنا شعر ابو الطيب وشعر الغيهباني=مانشدنا عاقل المره عنه ياقوم مرّه !
عبدالله الاصعر
يامحمد نحفظ الرفقه مع حقوق العواني=وانته بناخيّه وتال الزمن درب تغرّه
والله انّا مانحدت من حديث الاصفهاني=وانت عاقل بس تجحد للصحيح ولا تقرّه
« آخـــر الـــمـــشـــاركــــات »
01-Feb-2010, 10:29 AM
العرض الشجري