((ماني عجولٍ بالزعل))

[كلاشينكوف]

اخواني ، شرفتوا الموضوع
لا هنتوا


و هذي القصيدة كتابية ..

أنا رفيقي ماسمع اللي حكابه= لو جاتني منه السوالف مضاريع
اقرا مفاهيمه واحسب حسابه= واشوف مدخال القدم والمطاليع
ماني عجول ٍ بالزعل في غيابه= قدّام ماسمع منه مااعطي ولا ابيع
لاخير في رفقه بليا حبابه = ولاخير في جمع القلوب المواجيع
رفيقك الغالي تحمّل عتابه = واحلم عليه ليا دفعته دوافيع
شيِع ثناه ولاتبين عيابه= عاره يعورك يابعيد المراميع
وان كان دون مرافقك صك بابه= لقه قفاك وخل مشيك مع الريع
خله على بعدك يسرح ركابه=يقضي سنه ولا شهور ٍ واسابيع
وليا طلبك الصلح يامرحبابه= سهل طريقه لا يجيله موانيع
واحفظ لسانك عنه واستر جنابه=لاتجرحه بين الذياب المجاويع
ترى اللسان ملكع ٍ يندعا به= مثل الحصان اللي يبي له مصاريع
واجعل على هرج ٍ تقوله رقابه = عقل ٍ يصرف طايشات المواضيع
والصمت في بعض المجالس مهابه= يكفيك شر اهل الفمي اللواسيع
عن كلمة يقضب خطاها قضابه= يركض عليه مصنع الهرج تصنيع
خله يروح ومنك خال ٍ جرابه=يرجع كما المفلس بسوق المطاميع
واحفظ صداقة طيبين القرابه=ربعك ليا قلت عليك المشاريع
سيف ٍ نهار الضيق تقضب نصابه=ياقاك من حدب السيوف البواتيع
ولا جفاك الدار مالك ومابه=رزقك على اللي طوع الكون تطويع
مقعدك في حزم ٍ تطارد سرابه =اخير من شوف الوجيه المدانيع
خطو الرخوم مصاحبين الخيابه = تجار هرج وباللوازم كراسيع
الرجل مثل الذيب رزقه نهابه= ياخذ مع الدو الخلاوي قراطيع
والطيب ضلع زاميات ٍ هضابه= للريح في شامخ ركونه ذعاذيع
عسر المراقي يتعب اللي رقابه= ماياكره كود الحرار القواطيع
والا الردى جرف ٍ هيال ٍ ترابه=حوله لزهران المقافي مرابيع
يرقد به الحصني ويلقى الذرى به= والبوم بين غصون قشعه مواقيع
رجل على الناموس بيض ٍ ثيابه=ورجل ٍ يرقعها على المتن ترقيع
ورجل يزايم علته من عذابه= عيدان ناره للقريب مواليع
على ربوعه كل يوم ٍ طلابه=خماش وجه ولالقيبه منافيع
ورجل ٍ مع الايام ماينصخابه =عون الرفيق ليا صفعت الصوافيع
غيث ٍ على من جاه يمطر سحابه= عشبه على روس النوابي مفاقيع
ورجل ٍ كما ليث ٍ عطيب ٍ صوابه= من دون حقه سنع الخصم تسنيع
طيب وعصمان الشوارب تهابه=يرجى وتخشاه الرجال الصعاصيع
ومن لادرى بالناس ماحد ٍ درى به= ماله على سجل النشاما تواقيع
ومن لايحوش النعم فاول شبابه= في شيبته يحسب حساب المراضيع
وختامها ذكر النبي والصحابه = واستغفر اللي مايضيع ولا يضيع