||<->|| ياأحمد تولاّني الهاجوس وأجهدني .. لاطرّف الليل سرّا وأحتمى نبله ||<->||

[حسن إبراهيم الدجيماء]

السلام عليكم
..

ياأحمد تولاّني الهاجوس وأجهدني = لاطرّف الليل سرّا وأحتمى نبله !!
حلو الكرا منه ثقل الهم يقعدني = وإليا حِرِمت الكرا قمت أترقّب له !!
( أحيان يرجع قبل وقت السّحَر يدني = وأحيان ماألقاه لابعده ولاقبله ) !!
اللي كسبته صلاتي يوم يهجدني = لامرّ ثلثين والوجهة على القبله !!
رفعت يدّي لمن يفرج ويسعدني = ألحّ بدعاي خاشع وأتقرّب له !!
اللي لياضقت من دنياي زوّدني = ماشحّ في مدّته .. ولاقِطِع حبله !!
والبارحه زمرة أوجاعي تراودني = والكبد من بعض خلق الله مندبله !!
سبّة هذاك الضعيف اللي يتهددني = مايدري إني طويل ذراع ماأحسب له !!
ببيوته العجف .. يهجاني ويقصدني = وأنا أترفّع عنه .. ماودّي أكتب له !!
مسوّيٍ عنتره يوم يتوعدني = وأنا أعرفه لاهو بعنتر ولاعبله !!
ردّي عليها لك الله مايعقّدني = لاكنّ شعري منزّه مايناسب له !!
خوفي .. مع أهل السّطر بكرة ينقّدني = يحسب خطاي بعشر والردّ يحسب له !!!
مالي عذر منهم ولاهو بفايدني = لاسِجِّل إسمي فـ ( list ) العالم الخبله !!!
والشعر ورثٍ لي وجدّي مزنّدني = ورثه .. قبل صبّة القبّار تنصب له !!
معاهده بالشرف .. وهوه معاهدني = في جلّ الأحوال ينسب لي وأنا أنسب له !!
لاكن تكفى يابوصالح تساعدني = هاك الزم بيوتي وحثّ الركايب له !!
وقلّه يرّيح بليسه لايعاندني = تراه لن عادها ماهوب بأطيب له !!

..

إحترام الخاص لـ / كم !!