هذه مساجله بين عميد شعراء الجزيره/عبدالله بن عون ومحمد الخس
والله مابيعك بالغنـم يالمغاتـيـر =واني مابدوي بك من الناس شاوي
حتى تخضين الفيـاض المخاضيـر=وتقطفين ارقـاب نبـت الصـداوي
ليا جاء لروس قليقلانـه نواويـر=مثل الدقوق بريش خطو النـداوي
البل محبتهـا لهـا طابعـن غيـر=ليا وقعت فالقلب ماهيـب تـاوي
ثنتين مافيهـن مسـاوم وتسعيـر=لا فاتن الرجـال طـاح متسـاوي
دامه يراودهن وهو في رجاء خيـر=ولا غيرهن لمراض روحه مـداوي
وليا تركهن هف مع شفـت البيـر=وصارت اموره بين هاوي وعـاوي
محبة الوضحـا وحـب الغناديـر=يستانس اللي في طلبهـا رجـاوي
ليا عرضت شقرا شعرها دعاثيـر=بعيونها تخلـف مسـار الهـواوي
واللي يبي يطلب عن القول تبريـر=لاينشـد الا طيبـيـن الهـقـاوي
يرفع لمثل لمحمد الخـس تقريـر=ويستنظر الحل الصحيح القصـاوي
واليا خذا التقرير من شاعر مطيـر=تـراه حلـن مايعقبـه دعــاوي
ويمكن يقول الثالثه نقلـت الطيـر=اليا حصل رفض الجناح الرهـاوي
رفض الجناح اللي ليا استتبع السير=حول على راسه بالامر السمـاوي
طرح الشبك ماهوب من وارد الجير=من طار من عشه امراحه خـلاوي
رد محمد الخس
جتني بيوت مصخر القاف تصخيـر=عبـدالله النايـف ربيـع الفـداوي
يقـول وش رايـك ويبانـي اشيـر=رايي مثل رايك على منـت نـاوي
ياراعي الوضح الخيار المصاغيـر=اللـي لمثلـك ماتجـي بالمنـاوي
لاتطيع بالمغتـر جميـع المشاويـر=كانك علـى لـذات قلبـك شفـاوي
خل الغنم لو هـي تجيـب الدنانيـر=راعي الغنم فقري لو انـه غنـاوي
ليا طاح من غر المزون الشخاتيـر=فأرضن بعيدأ دونها الذيـب عـاوي
ثم جاء لعشب الوسم فيها دواويـر=وتغاوزوها مـن جميـع النحـاوي
راع الغنم ماهوب ياصـل بتيسيـر=الا بشيـل وحـط واخـذ وكـراوي
والبل تزاعج مع وجيـه المظاهيـر=يومن لها عشر اجبتـن للشـواوي
تاصل ولو ان الحيا من ورى الذيـر=مادام تلقى مـن شحمهـا شـلاوي
ويضأ ضحاياهـا رقـاب المناعيـر=يوم الطرب قبل السـلاح النـواوي
وان جتك عكشأ مثل خشف الحمارير=نبريـه تبحـث خفـا كـل غـاوي
ارجع لها لو يزعلـون الحجاجيـر=كان انصحت لـك بالغـلا لاتـراوي
والاشقر اللحـاق عـوق المدابيـر=لاتتركه دام انـت هـاوي وقـاوي
اللي تماري بـه جميـع الصقاقيـر=لاجيت قاعن فيه عشـب وحـراوي
وانته سديد الراي في كـل تدبيـر=وتسنـع الغـاوي كفيـت البـلاوي
21-Jan-2009, 03:33 PM
مســــــاجله
العرض العادي
