رد الاخ سويلم على قصيدتي ........

[سلطان السبيعي]

هذي القصيدة قلتها في اخ عزيز من عتيبة وهو سويلم بن محيل العازمي العتيبي ، اقول :
كتبت ما جا في الفكر على المعاني بالسطور

واخترت قافي من بحور الشعر والمعنى يبين

اقول ما في خاطري وللمدح مديت الجسور

اباصل الغاية ومقصودي عسى ربي يعين

برسل رسالة معطرة بالعود وانواع الزهور

مضمونها في وسطها مكتوب بالهرج الثمين

في مدح رجال بعيد ومسكنه وسط الصدور

من لابة دايم تصد الخصم وتعين العوين

ابومحيل اللي من اهل الطيب وابوانه صقور

على سلوم اهل المعزة وفي دروب الطيب

من روس قوم فعلهم في المدلهمات مخبور

وتاريخهم معروف عند الناس من ماضي السنين

لا جا نهار به يشوش الراس وزناد يثور

الكل منهم مايهاب ويورد حياض اليقين

ونطيحهم لاطاح لعظامه ما يلقى له جبور

وعدوهم ما يهتني في نومته لوساعتين

وجيرانهم ما تشتكي منهم على مد الدهور

ولضيوفهم يقدمون الحيل والكبش السمين

ودايم مجالسهم تفوح بريحة البن وبهور

في مجلس يرتاح به من كان به هم دفين

وأنا بعد خاويت رجال على الشدة صبور

سويلم اللي يضرب القاسي الين إنه يلين

وأنا ليا مني بغيته وصار بي وقتي يجور

ألقاه في مجلس نشامى ولحواتن غانمين

الكل منهم يبتهج لامن لقيته بالسرور

ربع قروم وكل واحد منهم ذرب اليمين

ومحلهم يكرم عن الخايب وعن كل معثور

والشك عنهم زايل وكلامي هذا باليقين

وابي السموحة لو حصل مني وفي المعنى قصور

ياجعلكم في كل يوم وكل عام سالمين

وصلوا على من جا للأمة بالبشارة والنذور

عداد ما في الكون من كفار وإلا مسلمين

*********وسلامتكم **********

ورد علي الاخ سويلم لكني ماني حافظ رده ولعلي اكتبه بعدين

[سلطان السبيعي]

هذا رد الاخ سويلم علي ، يقول :

يامرحبا عد الليالي وعدة ايام الشهور

وعداد ما رش الرشاش اللي حقوق بالغشين

برسالة جتني من الغالين بأنواع العطور

مابين مسك وبين عود وبين نفحة ياسمين

مكتوبة بالورد والريحان واعز البخور

تبهج ضمير منبسط وتنشط القلب الحزين

من ربعة وافين في كل المعاني والامور

سجل لهم تاريخهم راع المزاريق الثنين

يجددون امجادهم بالطيب من هاك العصور

كل يجدد دوره اللي حاضره دنيا ودين

عرينهم ثابت ويجنى له نمور من نمور

ياحي منهو ياسعد مجناه من هاك العرين

وقت السنين الماضية يوم الحرايب والشرور

مروين من عدوانهم بالمعركة حد السنين

ليا من نار الحرب شبت والرحى قامت تدور

عدوهم حبه ليا طب الرحى يصبح طحين

قدام يحكمها الامام بسيفه الساط البتور

عبدالعزيز اللي حماها من جميع الطامعين

عشرين عام يسجها مافيه نوم ولافتور

يسري ويجري لين ثبتها على حصن حصين

ثبت قواعدها على التقوى عن اصحاب الفجور

ثم اصبحت بالشرع تحكم عقب حكم المشركين

عساه في عليين والفردوس يبنى له قصور

في رحمة الرحمن والي العرش رب العالمين

وتوارثوها عقبه الابطال وافين الشبور

ابناه ساروا سيرته لسياسته متوارثين

كل يطورها على دوره يزيد النور نور

لين اصبحت فيها الجوامع للبنات وللبنين

وان كان تطلبنا السموحة فأنت وافي ومعذور

ومشكور على اللي تذكره في ربعنا يابوثنين

وعلى نبي الحق صلوا يالغياب ويالحضور

شفيع الامة في نهار به يشيب المرضعين

######وسلامتكم ######

[معجب العتيبي]

ممكن ياغالي تحطها مع قصيدتك او تجيب قصيدتك هنا


عشان يطلع شكلهم احلا واللي ماقرا قصيدتك يقراها

وشكرا

وصح لسانك ولسانه

[سلطان السبيعي]

يااخوي معجب انت المشرف على المنتدى وتقدر تحطها مع قصيدتي ، ، أنا حاولت وما قدرت ، ومشكور على هذا التنبيه

[معجب العتيبي]

قمنا عمل اللازم

وصحة ابدانكم

[محب الهيلا]

مشكور وماقصرت

[معلا إبراهيم الأسعدي]

صحة السنكم جمياً
شكرا

التوقيع