((((ديوان مقبل بن جودان ))))

[قادم]

(هذه قصيده ذات موضوع خاص للشاعر/ مقبل بن جودان الرويس)

البارحه مع هجعـت الناس قررت=اسهـر على نظم القوافي والامثال
ما طاب لي نوم العرب يوم فكرت=اجيب ما عندي وانا ضايق البال
ارسلت فكري يمة السيف وابحرت=في زورق ٍ ماللردي فيه مدهال
انا الوحيد اللي دخلته وسافرت=مع غبة ٍ وسط البحر مالها جال
حتى وصلت لموقع ٍفيه قدرت=عمق المسافه بين نفسي والاهوال
عنده نصبت لزورقي ثم حدرت=شبك ٍ شرابيكه كما فخ حبّال
يمشي معي بالطوع من حيث ما سرت=صيده حسب ذوقي سمينات وجزال
ابطيت المه ما تعبت وتذمرت = لين استجاب وجاك بالحمل يختال
حزة جذبته بالسبب ما تأخرت=قمت افرد الجوهر وانقيه فالحال
آخذ غـزيز الصيد لامني اخترت=واترك هزيله فال من كان له فال
نظمتلي عقد ٍعلى شانه اسهرت=عين ٍ لها مع سوء الاقدار موال
وان ضقـت من هرج الرخوم وتكدرت=جالي على بعض التعابير مدخال
هذا الوكاد اللي جبرني وغيرت=راي ٍ ذكرته في ثلاثين شوال
اخطيت في فرضه عليكم وكثرت=بس الخطا مرجوع والحق ما زال
وانا صبرت وشفت ما عفت وانذرت=لكن ما فاد النذر والصبر طال
لا تحسب اني من كلامك تضررت = ياللي تقول ان الشعـر ضحك وهبال
والله لو انك رجعت وتعذرت=اني ماقول من الهجا ربع مثقال
والشعر هو سلاحي ان كان عبرت=يشفي غليلي من من شواكيش الانذال
ياما نصرني لا تعومست واحترت=مثل القلم والسيف ماضي وفعال
والا انت مالك عندنا يالردي كرت=ما تنسمع كلمتك لو قيل رجال
خبل ٍ يهمك ما جمعته ووفرت=تبخل على الضيفان يالهيس بريال
وقت اللزوم اليا بغيناك قـصرت=ما تنطح الواجب عسى مالك عيال
ما قط قالوا لي على الطيب بادرت=مكسبك دايم دون يا شين الاعمال
ذليت نفسك من زمان وتعثرت=تامر عليك الحرمه وتنحني ذال
محكوم في ظل امرها ما تحررت=امضيت نصف العمر سايق وشيال
ياهون قدرك لو عليت وتكبرت=يا مرتع النمه ترى الموت ختال
يقطعك ما عمري سمعتك تحاورت=الا تسب وتنقل القيل والقال
كم واحد ٍغافل بهته وجاهرت=واسرفت في ذمه على كل منوال
الله حسيبك بالرذيله تمظهرت=ما تعرف انك للردى صرت مرسال
والحكمه اللي يوم شفتك تذكرت=ما ترفع الرجال حفنه من المال
يا وين ابلقى شاعر ٍ يوم دورت=يشرب معي بين الصلاتين فنجال
ابدا معه طاروق لا مني احضرت=وان حضره قبلي ترى ما به جدال
ما قالوا اني مع جنابه تشاجرت=حيث ان صحبتنا على طيب ودلال
في مجلس ٍعامر حضرته وبكرت=هاذي سواتي مع مداغيش الابطال

[قادم]

هذه القصيده موجهه من الشاعر/ مقبل..الى الشاعر/عبد الله بن علي العتيبي

ليل الخميس اللي مضى قلت واسهبت=واليوم اقول اللي تعبت وكتبته
قاف ٍ على نظمه سهرت وتدربت=من طيبات افكار مخي جذبته
ياما على شانه بحثت وتعذبت=اغوص في بحر الشعر لين جبته
وليا بغيت اهديه ما عنك جنبت=يا شاعر ٍ كل احترامي كسبته
حيثك ذهبت مع العوارف وجربت=والشين عفت موالفه واجتنبته
يابو علي يوم انك اشملت واجنبت=واصخيت مالك للرفيق ووهبته
وابحرت في بحر الشعر بعد ما تبت=مابه ولا طرق ٍ بقى ما لعبته
شرقت مع سوق القوافي وغربت=واليا عصاك القاف مثلي غصبته
ما شفت لي حظ ٍ غدى ليلة السبت=ضيع مساره في دجى ليل سبته
اتلى العهد به بين ساجر وابو نبت=يوم انسدح فوق الرصيف وقربته
قلت اتمسك فيه واثري تسببت=في كسر ساقه يوم قمت وسحبته
ثم انطلق مني على غير ما حببت=جهدي قصر دونه وانا ما طلبته
روّح على وحده تشيله مع الخبت=ما ظنتي يرجع بعد ما ندبته
من عقبها غيبت زوله وانا غبت=فوق الميه عشرين شهر ٍ حسبته
فيها تعبت من الضياع وتعذبت=حتى لذيذ النوم فيها حربته
مذهب وادور له مع الناس واذهبت=حالي على شي ٍ جرى ما رغبته
شي ٍ من اسبابه على الموت قربت=لو استطيع اخفيه عنكم حجبته
يا فزعة الله شاب راسي وشيبت=في ظل هم ٍ ضيق الصدر كبته
قالو تعالج قلت فيكم تعجبت=وين العلاج اللي ظهر ما جلبته
حتى الصبر عالجت ابه يوم حسبت=خاطبت وده مرتين وخطبته
وان قلت طبت اكذب على الذات ما طبت=حملي جبل لا تحسب اني غلبته

مردود الشاعر/ عبدالله بن علي العتيبي

طار الكرا عن موق عيني وهندبت=وقضبت طاروق القصيد وصلبته
وسميت باسم اللي على العرش اله ثبت=اللي على سبع السموات ثبته
الواحد اللي له رجيت وتطلبت=يفرج لمن سود الليالي انكبته
يا ذيب ياللي فالمحاجي توثبت=الله من صوت ٍرفيع ٍقنبته
وياما مع اصوات الحمايم تجاوبت=وراسك لصكات البلاوي عصبته
وياما لغارات الغداري توهبت=وهجرست مع سرحان الاخر واجبته
وياما جذبت من الطويله وذنبت=وياما صفى الصافي وياما شربته
وياما لربعك فالدعاوي تنصبت=واليا ارتخى حبل المعاند كربته
واليا نويت مصادم القوم ماهبت=حتى البحر غطست فيه وركبته
وقضبت عرقوب المضلع وزهبت=وصيد الخلا من كثر رميك رعبته
وصلحت في بعض الدعاوي وخربت=واليوم حبل ارشاك عنها قصبته
واخذت مع درب السراه وتعرقبت=تبي بعض شي ٍ عقبك وعقبته
ومن مزهب الشيخ البخاري تزهبت=ومسحت ديس ام العبر واحتلبته
وانا ما قول انك على نفسك اذنبت=ولا اقول رسـّنت القعود وشعبته
وانا وماملك ياصحيبي ومانجبت=يفداك لو العقل مني سلبته
والحق الك يابو سعود ان تغضّـبت=الا ان حق النفس عني شطبته
اراه عفو ٍ منك ولعفوك ارقبت=واذهبت ما في خافقي لين اذبته
ومن كثر ما تشكي ذهبت وتذلهبت=واخطيت دربي يا صحيبي واصبته
واليا سمعت لصوت مقبل تكهربت=ولجلج حشى قلبي وطقت اعصبته
ياما علي اندب وانا يمه اندبت=يسرح ويمرح لين دخلت اخشبته
وانا ليا ما رحت يمه تعايبت=والشين ما عنه الاوادم انسبته
مذهب وينخاني وانا عنه ما غبت=ولو قال هات الطير قمت وقضبته
ارسلت رجليه مع الدرب واركبت=جيش ٍ على خشم الرويكب اهدبته
وعن سارحات اليوم الاول تنوبت=وبجت الفجوج وكل فج ٍقلبته
ولقيت حظه عقب ما دخت واذهبت=نفسي وراس النضو عوجا ارقبته
في عش طير ٍ في حجى الضلع ابو جبت=اللي على جيبوت ترقب ارجبته
ومع دولته بايات ربي تخاطبت=وقلت ارسلوه الصبح والا نهبته
انا اشهد اني يوم دورت ما خبت=بكره يجيك ولا تعدى اعتبته
تمت بذكر اللي على العرش اله ثبت=اللي حمى بيته وطهر اكعبته

[قادم]

هذه ابيات غزليه للشاعر/ مقبــل بن جودان..

يابعد ديرتك ياخلي= عن بادية نجد واترابه
والبعد عن شوفك يخلي =راع الوشم يفقد اعصابه
في ما مضى كنت ترسللي=والشوق ياصلني كتابه
واليوم وش صار الك قلي=قطع الوصل كيف ترضابه
اخاف ودك تبين لي=ان الرجا مات طلابه
خبري بك العام صاف لي=يوم الوصل فاتح بابه
حتى ان طيفك يخيل لي=ان الجمال انت من جابه
دايم خيالك مثل ظلي=واحيان يكشف لي احجابه
ما كنت اظنك عدو لي=لين الهجر بانت اسبابه
غدرت بي جعلك تولي=ما تعرف اني من اعتابه
والغدر ما هوب طبع لي=ما نيب من يخدع احبابه
بس اسمع الرد وافطن لي=لا تمسك البيت باطنابه
ترى العهد صار منحلي=ما نية الخير بطلابه
وان كان هذا برد غلي=حكم الجزا طاح باحسابه
والا ترى الحكم عند اللي=يقدم على الموت ما هابه
راع الغرابه تزهل لي= يجيب الي حقي انهابه
حيث ان مطلق صديق الي=واعد نفسي من اصحابه

[مرزوق حمدان العتيبي]

..
لاهنت يالقادم ..
وقصايد مقبل من انفس القصائد ..

الف شكر ولي عوده لنقل جميع القصائد الى الصفحه الاولى ..
تحياتي

التوقيع

فدوة ٍ للمصطفى روحي وماتملك يميني = كيف (لا) واللي خلقني حط حبه في كياني حط حبه في كياني ماتغيّره السنيني = وانثني من دون عرضه بالذراع وباللساني @Marzouq_MHD