قصيدة فواز الغسلان في العتبان !!!!!

[الشـ سلطان ـمال]

السلام عليكم ,,
هذه القصيدة للشاعر فواز يحيى الغسلان وهو من سكان اهالي بقعاء يمدح فيها العتبان ويقول :.


من طاح ماحوله من الـنـاس عتبان=او يسمعه رجلٍ خـواله عتيبه

فـهـو طـايحٍ رجواه في كان ما كان=وياقرب رجله من خطوط الغليبه

شهادةٍ يشهد عليها ابن غسلان=ومن كان وسط الناس يدرى نصيبه

من عقب ماخاويت عالم وعربان=شباب واللي لاح بالوجه شيبه

ولـقـيـت بالعربان زودٍ ونـقـصـان=مثل الزمول ولافحات السبيـبه

لكن سنام اهل الفزايع والاكوان=واللي تسدك بالوقوت العصيبه

في روق مع برقا صواريم عدنان=اللي بوقت الكون تجدع حريبه

من وين مازرت الاجاويد يافلان=في مجلسٍ فيه الوجيه النجيبه

الا سمعت اللي ذكر حادثٍ بان=ولاشاف رجلٍ بالفزع ينتخي به

ونخى العتيبي وانتهض مثل راكان=وصارت من العتبان ماهي غريبه

وصارت تكرر مع رفاقه وعدوان=وتلفت نظر كل العقول اللـبـيـبـه

غير الذي شفنا بهم شوف الاعيان=كنه غدت لاسم العتيبي ضريبه

لاصاح صياح الاجـاويـد بلشان=وبـيـبان حل القوم ماهي قريبه

يشكي دروبٍ به ثمانين شيطان=وجرحٍ عجز ياصل حراوي طبيبه

ونخواه ضاعت بالهواء تقل دخان=مع عاصفن بالصيف يدفن قليبه

ياكثر من يبقى من الناس نعسان=او قال بلشات العرب وش نبي به

الا العـتـيــبي يـنـفـجر فيه بركان=وكبده على الفزعات يقدح لهيبه

اصغرهم اللي بالفزع طير حوران=والا تشوفه مثل سرحان ذيبه

حاديه طيبٍ عايشٍ طول الازمان=مع والدٍ يشفق لطيبة نسيبه

وقلبٍ بموج الطيب يسقيه شريان=وجيلٍ قديمٍ شاع بالناس طيبه

شبابهم تغني عن النـاس شيبـان=وجنودهـم فاقـت مراتـب نقيبـه

ماطاوعوا بالمهزله نصح كوبان=والطيب لا مطمع ولا هو غصيبه

لاشك ماله بالـمـهاريب بـيـبـان=ونفسٍ تشوف الهون عار ومعيبه

والناس كله بالـفـراغــات شجعان=وتسمع هروجٍ بالخـلايـق عـجيبه

والكود لطبوع الـمـخـاليق ميزان=لا قام وقت الكود يقرى خطيبه

يظهر لك اللي يحتمي تال الاظعان=ويمناه تغني عن جيوش وكتيبه

يذري على الشده ضعافى ويتمان=ورجلٍ وقع بالناس ساقه حطيبه

ونسل الردى يبني مخابي وجدران=ويشرب من دلال الفزايع سريبه

من لاذ به في ساعة الكود خسران=ويابعد مشرق شمسها عن مغيبه

ولا لي مع العـتـبـان مطمع وخلان=لاشك جحد الطيب ياناس خيبه

وانا اشهد انه بالفزع شانهم شان=ومن يجحد اهل الطيب ربي حسيبه

وليت العرب عند المفازيع عتبان=وياقرب طيب اللي خواله عتيبه

صح لسانك يابو فهد
وان شاء الله تعجبكم القصيده

آخر تعديل الشـ سلطان ـمال يوم 13-May-2010 في 12:01 PM.

[نايف بن شامان]

صح لسانك اهنيك على القيصده مو غريبه على عتيبه

[محمد العتيبي]

صح لسااان الغسلان ولا عليه زود


وبيض الله وجهك ياسلطان الشمال على النقل المميز

تحيتي لك
.,.

التوقيع

للتواصل عبر twitter تويتر al_bargawy@

[الشـ سلطان ـمال]

نـــــــاإإإإيـــــف


مـــــحـــــمـــــد


شاكر مروركم

تحيتي

[الحميدي العتيبي]

بيض الله وجهك وصح لسان الشاعر ولا علاه زود
لاهنت يا سلطان الشمال وحياك الله بينا في منتدى الهيلا

[أبونايف الروقي]

	بيض الله وجه الشاعر والناقل ولا على الجميع زود

[الشـ سلطان ـمال]

الحميدي

ابو نايف


شاكر مروركم

[ابن عقاب الشمري]

صح لسان الشاعر و الراوي / فواز الغسلان الشمري ..



ولا لي مع العـتـبـان مطمع وخلان=لاشك جحد الطيب ياناس خيبه



شكرا على النقل ..



تقبل مروري

[الشـ سلطان ـمال]

شاكر مرورك يا ابن عقاب

وفواز والف نعم فيه وفيك وفي من يقرأ
لكن ماهو شمري

هو من عائلة الغسلان

على العموم شرفتنا بمرورك

[الدقيق]

صح السانك قايلها وبيض الله وجهه

وصاحب الموضوع عساك قوي دوم ولا هنت