ما عاد يفرق زول حرمه ورجال ... لنوف بنت شطيط

[الوليد الاسعدي]

المرجله

إذا المراجل لبسة شماغ وعقال

قل للعذارى يلبسنّ العمايم

ما عاد يفرق زول حرمه ورجال

دام الفعايل تشبه البعض دايم

المرجله ما هيب كلمه وتنقال

وتروح ما راحت هبوب النسايم

وإلا خشونة صوت أو رفع الأثقال

أو رزة صدور وفعل الزلايم

ولا هي بعد مفتاح موتر وجوال

وإلا ردى لسانن حديثه شتايم

المرجله شيمه عن القيل والقال

رفيع نفس (ن ) حر بالجو حايم

المرجله عقلٍ وزن وزنه جبال

ودون العقل وش فرقنا والبهايم

يا مسندي لو مايل الوقت بي مال

يا ولد أبويه يا عظيم العزايم

يا معرب الجدين من العم والخال

يا نخوة المفزوع وقت الهزايم

المرجله يا خوي هي طولة البال

هي العزم هي الصبر فالظلايم

فيها الكرم عزه دله وفنجال

فيها الكرامه عن ردى الطبع شايم

والدين لامنه خذا القلب منزال

مشى طريق الحق وابليس نايم

ومن لا عرف ربه في طيب الحال

لابد وقت الضيق بالهم هايم

حتى صلاتك مع جماعات ورجال

في خيرها يا خوي نعم الغنايم

ولامن نصف ليلك قم صفي البال

يا عظم أجرك بين ساجد وقايم

ولا من رفع ربي له كل الأعمال

حسن الذكر لا قالو فلان صايم

وخلك شريف القصد يا طيب الفال

سوء المقاصد فالبيوت الهدايم

واحذر تبيع النفس في درب الأنذال

وتتبع خوي إبليس راع النمايم

النفس خيل لك إذا كنت خيّال

ومن لا قوى نفسه قوته الهزايم

ولا صرت ما تدري لو يش أنت رجال

والله خسارة فيك ذبح التمايم


نوف بنت شطيّط العتيبي

التوقيع

و أنا عتيبي من سلالة هـوازن *** ربعي عوايدها الفخر من جدودها ما نوشي الفتنه ولا نحرث الردى *** ولا نهاب اليا تسامت وقودها ان ميل الميزان من قوم يمنا *** صبرنا لها لوكان كبرت لهودها وان ميل الميزان منا على العدا *** نروي من السم السقطري كبودها

[الحطيم]

السلام عليكم ورحمة الله وبركاته
اخوى الوليد الاسعدى الله لا يهينك
على النقل والاختيار الموفق وعز الله
انها قصيدة جزله واخيرا اقبل تحياتى.......

[أبو الوليد]

الاخ العزيز : الوليد الاسعدي

الحمد لله على السلامة

من طول الغيبات جاب الغنايم

وعودتك هي الغنيمة كلها

وتسلم يالغالي ,,,

التوقيع

https://twitter.com/abalwled عَظيمةٌ أنتِ يـا أرضَ الرسَـالاتِ = يا مهبطَ الوحي فِي خَتْـمِ النبـوَّات أنْتِ السُّعُوديَّةُ العَلْيَـاءُ فِـي شَمَـمٍ = تَعْلُو عَلَى كُلِّ مَنْ تَحْـتِ السَّمَـوَاتِ

[أبو فيصل]

مميزة يالأسعدي

الله يعطيك العافية اخوي وسلمت يمينك على هالنقلة المميزة

التوقيع

لا إله إلا أنت سبحانك إني كنت من الظالمين

[داهية عتيبة]

الحمد الله على السلامه يالأسعدي


دائما ماتجيب ألا السمين ياطيب الفال




لاهنت


وتسلم يمناك..

[وصل العطياني؟؟؟]

الله الله الله ...

قصيدة قوييييييييييية ...

كل بيت يقول انا احسن من الثاني ...

عز الله إنها تمثــّـلت ...

والشكر الأجزل لك " الوليد الأسعدي "

فعلاً هذه أحد غنائم الغيبة



تحيااااااااااااااتي

التوقيع

na111na@hotmail.com

[راعي صبحا]

الوليد .. شكراَ على النقل الطيب ..

وصح لسان الشاعرة والله , فهذه القصيدة فيها الكثير من الحكم والنصائح للرجال .







راعي صبحا

[الوليد الاسعدي]

يوسف المقاطي : شكرا لك وسعدنا بانضمامك للمنتدى مؤخرا مع ابداعاتك الشعرية .
ابو الوليد : الغنيمة هي معرفة امثالك ومبروك الاسم الجديد .. تقديري لك .
فهد : حياك الله ياذيب واشكر لك جهودك وهناك بحث ياليت يخرج للمطبعة وهو علاقة الشيابين مع الذيابة بالذات .
داهية عتيبة : الله يسلمك وحنا والهيلا مثل نهر النيل والمصريين على قولتهم من شرب منه حيرجع تاني !
وصل : شكرا على المرور وصح لسان الشاعرة نوف العتيبي وبنات عتيبة مشهود لهن بالشعر العفيف المليئ بالحكم .
راعي صبحا : يسعدني مرورك وكم يسعدني ايضا تواجدك المستمر في المنتدى ... سلامي للجماعة .

[رعد]

هذي القصايد والا بلاش
والله ما مثل عتيبة في القبايل لاشاعرات ولا شعار
احفظوا اسمها .. نوف العتيبي

شكرا للمشرف الاسعدي على هذا النوع من القصايد

[ابن مشيب]

اخي المشرف العزيز/ الوليد الاسعدي

مشاركة واختيار رائع بكل المقاييس , وقصيدة معبرة وجزلة , اشكرك على هذه المشاركة.

وقد نزلت قصيدة الشاعرة نوف بنت شطيط العتيبي , في جريدة الجزيرة يوم الاربعاء الموافق 16-12-1425هـ بعدد 11808 , وفي الجريدة نفسها يوم الخميس الموافق 8-1-1426هـ بعدد 11830 , رد على قصيدة الشاعرة نوف بنت شطيط العتيبي , الشاعر حمدان بن مسعود الرقاص العتيبي , يقول فيها:

نوف العتيبيه تغنت بالامثال=جزل البيوت المرهفات الحشايم
ابيات صاغتها كما عقد سلسال=لعيون وافين الخصال العظايم
اغلى من الياقوت واغلى من المال=ويصعب ثمنها بين بايع وسايم
ليت العذاري لو على رؤوسهن شال=مثلك يانوف يحرمن الهلايم
سود الوجيه مخيبة كل الآمال=اللي مكانتها مكانة قمايم
انذال ما تسوى لها قرش وريال=من فعلها ما شافت الا الندايم
الكل منهم خاب لو قال ما قال=ولاهوب محسوب على اهل القدايم
خايب رجاء لو يلبس بشوت الابطال=واخير يلبس له عباه ولثايم
ما هو كفو يامر على بيت وعيال=الله يشيله مع جميع الخمايم
واللي مثل عزوتك للحمل شيال=عريب جد ولا تجيه الضوايم
يذكر بفعل الطيب في كل الافعال=ومع النشامى نال خير القسايم
يرعى حقوق الله ولاهوب محتال=ابيض وجه ما يلحقه لوم لايم
المرجله يبدي على رجمها العال=حراً شهر عن بومها والحمايم
وحاش المراجل كلها دق واجلال=وفي بحرها سابح وغاطس وعايم
في مجلسه يجمع له رجال ودلال=والعود الازرق وامهات القوايم
عزاً لربعه دايم الدوم لازال=حظه مع اهل الطيب والجود قايم
والمرجله لو هي صعيبه لها طال=يا جعل عمره ما تجيه الثلايم
هذاك تضرب فيه يابنت الامثال=راع الوفا والمرجله والولايم
والله يديم اهل الوفا سنين وليال=اللي تشيم لبسها للعمايم
ويابنت دايم وابل الخير همال=تبقى الرجال ولاتموت العزايم
تم الكلام وكلمة الحق تنقال=حنا الرجال مطوعة كل هايم
وفالشجره الخضراء لنا في وظلال=وبالعقل نفرق عن جميع البهايم

الشاعر/ حمدان مسعود الرقاص العتيبي



اخوك:
ابن مشيب