لطامة العايل ذباحة الحيل**كله وكله من فعايل يدانا

[رمح الهيلا]

	القصيدة في حفل الشيخ خالد ابورقبه

مال الجزاله غيـر شاعـر وحلحيـل=وجـزل المعانـي مايجـي بالهوانـا
ولا الحمول الا كمـا منكـب شعيـل=واجب علينـا نوفـي اللـي دعانـا
عادتنا فيمـا مضـى ليـن هالجيـل=ورثٍ مـن زيـاد المسمـى وجانـا
يومنها برمـاح وصقـل الرياجيـل=المـوت حـظٍ لـلـي والله عـدانـا
ياما شربنـا فالزمـن مـن فناجيـل=نرض اخصمانا قبل نرض اصدقانـا
لطامـة العايـل وذبـاحـة الحـيـل=كلـه و كلـه مـن فعايـل يـدانـا
مانتبـع المقفـي ولا نسمـع القيـل=نمشـي بعـون الله وكـلٍ ورانــا
اهل القنا واهل السيـوف المصاقيـل=وفـوق الحيايـا والعقـارب وطانـا
وربعي هل الحرشا هل الجيش والخيل=ياكـم دخيـلٍ اهتنـا فـي ذرانــا
فوق السنه شهرين هو عندنا دخيـل=فعلٍ عليـه شهـود حـق وضمانـا
فعلٍ لنا حصـرٍ كمـا نجمـة سهيـل=وسط السما لا شيف جهـر وبيانـا
مـن زود هيبتنـا وزود التهـاويـل=حتـى مطيتنـا تعـيـش ابأمـانـا
لا شيفت اوسوم الزيادي غدا الحيـل=وهاب العـدو اللـي بغاهـا ونوانـا
اهـل مهيوبـه للعـدا كنهـم سيـل=يّنـزل العالـي ليـا هـو طمـانـا
ومثل الحجاره من طيـور الابابيـل=تجعل من اللي كـان كنـه مـا كانـا
ومكرمين الضيف بالسمـن والهيـل=وخوينـا فقلوبـنـا لــه مكـانـا
سمحين في لينٍ وعسرين في ويـل=فينـا وفـا ماحـدٍ بلاحـق وفـانـا
وقت المواقـف مانهـون ولا نميـل=ارواحنـا ترخـص لرفعـت لوانـا
هذي حقايـق ماهـي حلـمٍ وتأويـل=وتاريخنـا يشهـد وكــلٍ قـرانـا
واليوم في وقت الرخـا والتساهيـل=عقب الامـن بفضـل ربـي غطانـا
في حكم من هـو وافييـن المكاييـل=ال سعود اهـل الفخـر هـم احمانـا
اخـوان نـوره كاعميـن المظاليـل=مـن بعـد ربـي بعدهـم ماعلانـا
وحنا اجتمعنا عقب تكبيـر وتهليـل=ليلاهنـا المعبـود ســر وبيـانـا
وفي ظل شيخٍ ماحسـب للمحاصيـل=مكـرم يمينـه بالعطـا والسّمـانـا
من شان ربعه ماهتنى بنومة الليـل=مايهتنـي ليـن اتسـالـم يـدانـا
ديّن وزاهد للحمـل لرتكـى يشيـل=صارم كما سيفٍ في عسـر الزمانـا
وكن الكرم ثـوبٍ وفصـل بتفصيـل=لشيخ نسـل الشيـخ راع الصيانـا
صامـل ولا همـه علـوم التماثيـل=وعشره ماترجـع فالزمـن للثمانـا
حتيش لو نكتـب ونبـدع مواويـل=مهمـا كتبنـا فيـه صعـبٍ وفانـا
والله يبـارك فيـه قـرم الرياجيـل=ابـو رقبـه خالـد ورافـع لـوانـا

الشاعر : براك الزيادي

	اسمح لي على تنسيق القصيده ومشكور على هالابيات الجزله فيمن يستحق ،وهذا وفاء منك بقول الشعر في رجال لهم افعال محط فخر لكل عتيبي مع تحية/ غازي البقعاوي

[ابوزعبه]

كفو والله كفو

[رمح الهيلا]

ابوزعبه شكرا لمرورك وبيض الله وجهك وتقبل طاعتك

[نفيعي وحيد]

كفو في ابو رقبه واهل مهيوبه كلهم

وصح لسان الشاعر براك الزيادي

[خيال_الشرفا]

كفو وصح اللسانك يالزيادي ويستاهل ابو رقبه

[عبدالله الجـــذع]

صح لسانه والى الأمام دوماا ....



يسلمكـ ربــي ...

التوقيع

قال الرسول صلى الله عليه وسلم [مَنْ قَالَ أَسْتَغْفِرُ اللَّهَ الْعَظِيمَ الَّذِي لَا إِلَهَ إِلَّا هُوَ الْحَيَّ الْقَيُّومَ وَأَتُوبُ إِلَيْهِ غُفِرَ لَهُ وَإِنْ كَانَ فَرَّ مِنْ الزَّحْفِ ]( سنن الترمذي ) . . قال صلى الله عليه وسلم : ( إن الشيطان قال : وعزتك يارب ! لا أبرح اغوي عبادك ما دامت أرواحهم في أجسادهم ! فقال الرب تبارك وتعالى : ( وعزتي وجلالي , لا أزال اغفر لهم ما استغفروني ) ... ( السلسله الصحيحه ) . موقع يضم جميع القراء هنا

[مستور المفرجي]

كفو والله يا براك النفيعي (( ابو بندر )) >> خويي في الشرقية وصح لسانك ولاهنت

ويستااهل الشيخ خالد أبو رقبة

والنعم والله في اهل مهيوبة شيوخ النفعه


شـاكر ومقدر لـكم ..

أخـوكم : مستور المفرجي

[رمح الهيلا]

شكرا لكم علي المرور
عبدالله الجذع
نفيعي وحيد
خيال الشرفا
مستور المفرجي

[عتيبي صريح جدا]

صح الله لسااااان الزيادي
وأبورقبه يستاهل
والنفعه موقفهم طيب وعلمهم يرفع الراس,,
ولاهنت يارمح الهيلا على النقل,,
تقبل تحياتي,,,

[عمهوجـ الدعجاني]

صح لسانه

والله يعطيك العافيه ع النقل