ملحمه تاريخيه في قبيلة العصمه

[الرتوعي]

بسم الله الرحمن الرحيم

لا جاء مجال الشعر في استطاعه = على نظم قافه بفن وبراعه
ولا اجيب من سوق الغلا اطرف بضاعه = افرق على السوام وسط المزادي
اقول قول ٍ يا هل العرف والشور = من هاجس ٍ لا هاض ماهوب محصور
دايم مطاليعه على نايف القور = وليا سرد ما قيل فيه انتقادي
انا بديت بذكر رب الجلالي = الواحد المعبود ماله مثالي
سبحانه الوهاب معط الجزالي = غافر ذنوب التايب من العبادي
هاض الهجوس بذكر قومٍ مداغيش = وافيين مافيهم رخوم ودراويش
من فعلهم كم عيف در المهابيش = يوم القضا معدوم وسط البلادي
اهل العطف فالحرب لا جاء قراره = يصلون للمركي بدون استشاره
وفالحرب لا كروا سوات النماره = ودرعٍ ضمينٍ لا ضونٌ الشدادي
الاد عاصم رفقتي دوم في زود = ياكم ومن معهم جلاوي ومضهود
يوم الديار تحوفها سباع ووسود = ولا فيه شخصٍ يهتني بالرقادي
كرو وفرو وارثوا مجد معروف = لا قلب التاريخ ماهوب محذوف
ما صار بالحيله ولا صار بصدوف = ولا صار في جلسة سمر بالبرادي
وثقهم التاريخ من دون تلفيق = والناس تدري بالقصص والطواريق
مفهومةٍ من بين كل المطاليق = اللي يرودون الكتب والنوادي
الاد عاصم عند قدح الزنادي = زمل المناخ ولا يجيها ارتعادي
يا كم تفانوا في صباح وهجادي = لعتيبه الهيلا رموز التفادي
وكم جاني بهيبة لحاهم تذرا = ونسي الجناية معهم ولا تحرا
انه يجي طلاب يمه بشرا = دامه بدار مخضبين الهنادي
وكم علق العاني عليهم عزيزين = من سبيع والا من عزاة القحاطين
ومعهم نسوا رفقتهم اللي قريبين = وتشاركوا معهم شرابٍ وزادي
ديارهم يوم البيارق تركز = معروفةٍ في نجد ماهيب تهتز
وكم راغبٍ فيها فواده محزحز = وده بملك دشاشها والحمادي
ويم الحجاز الهم بلاد ومعالم = محدده يوم القبايل تداحم
كم شتتوا عنها جموعٍ تحاشم = حامينها بالمرهفات الحدادي
وبيوتهم على النواز المنيفه = تعرف وتنصى فالليال المخيفه
والجار يلقى من شببها غريفه = مصفوطةٍ من جود ماله مرادي
وقوافل الحجاج من شرقٍ وشام = تعبر بهيبتهم قبايل وحكام
بوجيهم تمشي لميقات الاحرام = يوم الحدب ينقل وتقنى الجيادي
ولو بذكر بتفصيل كل العلومي = طال الكلام وصار كثر النجومي
لاكن ابا اورد شيء من فعل قومي = ولاني بقايل كود فعلٍ وكادي
كون الرشاويه لنا فيه محضار = يومن شاعر حرب يعلن بالاشعار
ولا خصنا الا من صلفنا بالاخطار = يعرف وتعرف لابته ما نحادي
وفالضال يومن العناتيت تحشد = من القبيله كل قرمٍ مردد
سهاج غنى بفعلنا ما تردد= لانه حضرله فعل ماهوب عادي
وبالحرمليه ضربنا يذهل اذهال = رجح بأرض المعركه كل مثقال
يومن بن ثعلي يغني بالامثال = هيض شعوره فعلنا بالهدادي
وفي يوم عرجا يوم قدح الفتيله = يوم الجموع تزوم مثل المخيله
خذنا من صنيتان عطفه جليله = ولا فكها شقر الرصاص المقادي
وبن رشيد بحيد كبشه غزانا = ودبس بجنده جمعنا وارتكانا
يبغى نتخاضعله وحنا عصانا = وعود كسير يحث دهم الجيادي
ويومه تسند جيش الاخوان شفقان = يبغى الحجاز يصير من ضمن الاوطان
فالقلب بارقنا معه خف وعنان = من ضمن نمرا ً ترهب اللي يعادي
ويوم الرغامه فالليال العسيره = جينا مية رجال معنا الذخيره
وصار النصر من قبل وقت الظهيره = وتباشروا الناس حضر وبوادي
ويوم تربة نادى نصير الشريعه = لكل مسلم ما يحب القطيعه
وجينا وبعنا ارواحنا خير بيعه = بيومٍ يشيب من بوسط المهادي
ويومن حكم الترك صار اله هيبه = النا فعل مشهور كلن دريبه
زيدون كم شتت جموع وكتيبه = بربعٍ لهم باسٍ مع اهل العنادي
وابو دخن جاء فيه يومن يروعي = والنا مقامن فيه بين الجموعي
نطش الذخيره بين كل الربوعي = كن العدو منا يسف الرمادي
وضلع اثلث وما صار بالضلع ضاري = غاروا على قطم المحازم ضواري
لكن فروا عقب ضرب السواري = وقر الامان بفضل ربي وسادي
وابو هضيد اللي جرى فيه موثوق = راحوا على قحطان تسعين مخلوق
واللي زبن منهم مصوب ومهتوق = واللي وقع بالاسر ماله معادي
ونعرف غزا العماج بالقوم وانكف = بالذود والهدف تهاتف وتلتف
ولحقوا بني عاصم ورووا ضمأ الشلف = وردت تداعج مقرعات التوادي
ويوم العويند والوطاه وذقانات = صدوا عن العتبان قومن وغارات
وخشم الحصاه مع الركا فيه ثارات = قضيت ومن قحطان حل السدادي
ولا نجحد حقوق الرجال المناعير = معشية ذيب الخلا وازقم الطير
من كل صوب الهم حشيمة وتقدير = من حضر والا من عموم البوادي
ذكرت نبذه موجزه محتواها = صدق الكلام لمن سمع او قراها
والسالفة تسند لمنهو رواها = حتى يبين العلم من وين قادي
ولو بذكر الامجاد ماهيب تنقاس = بمعلقاتٍ تكتب بوسط قرطاس
لكن صلاتي عد ما صلوا الناس = على النبي المصطفى خير هادي

وليد بن ذعار بن مغيرق

[أبو مرحبا]

ملحمه تاريخيه تذكر افعال قبيلة العصمه

صح السان الشاعر وليد بن ذعار بن مغيرق العصيمي

لاهنت يالرتوعي على النقل الرائع

التوقيع

إن قلَّـت الوزنـه وربعـي مشافيـح ** أخلـي الوزنـه لربعـي واشـومـي

[عقلية صريحة]

صح لسانك أخــــــوي قصيدة جزلة ولا هان قايلها وماقصرت

[مهند الشفيعي]

صح لسانك الشاعر وليد

قصيدة وافية لاهانك ربي يابن العم

تحياتي للجميع

[محمد العتيبي]

صح لسااان الشاعر / وليد بن مغيرق


قصيده رائعه ..


ولاهنت يالرتوعي على النقل الجزل



تحيتي
..

التوقيع

للتواصل عبر twitter تويتر al_bargawy@

[ابو فارس 511]

صح لسانك وبيض الله وجهك

[الرتوعي]

المشاركة الأصلية كتبت بواسطة أبو مرحبا

ملحمه تاريخيه تذكر افعال قبيلة العصمه

صح السان الشاعر وليد بن ذعار بن مغيرق العصيمي

لاهنت يالرتوعي على النقل الرائع

اهلا وسهلا بك

وشكرا على المرور

[الرتوعي]

المشاركة الأصلية كتبت بواسطة عقلية صريحة

صح لسانك أخــــــوي قصيدة جزلة ولا هان قايلها وماقصرت

اهلا وسهلا بك

وشكرا على المرور

[الرتوعي]

المشاركة الأصلية كتبت بواسطة مهند الشفيعي

صح لسانك الشاعر وليد

قصيدة وافية لاهانك ربي يابن العم

تحياتي للجميع

اهلا وسهلا بك

وشكرا على المرور

[الرتوعي]

المشاركة الأصلية كتبت بواسطة محمد العتيبي

صح لسااان الشاعر / وليد بن مغيرق


قصيده رائعه ..


ولاهنت يالرتوعي على النقل الجزل



تحيتي
..

اهلا وسهلا بك

وشكرا على المرور