بسم الله الرحمن الرحيم
الاخوه مشرفي واعضاء وزوار هذا المنتدي العملاق اليكم هذه المتواضعه ارجو تنال اعجابكم
لاوهني الي رصيده ملايين= ما شال هم الدين صاف (ن) مزاجه
ولا قفل الجوال خوف الديايين= تزهم تقول الدين نبغى خراجه
احدن يقول بلطف نطلبكم الدين=واحدن يقول اعجل ولاون حجاجه
طلاب حق ومن يقول اله بعدين= وقت الشقى ياناس ثور عجاجه
غلا معيشه ياعرب مع ديايين= ( والراجحي لراتب احكم سياجه)
نص (ن)خذاه ونص قسم الوراعين=غير الحوايج كم حاجه وحاجه
ورع يبي جوال خمسه وتسعين=وموتر جديد مسفط (ن)في كراجه
واخر يبى يلبس على موضة الفين=لبس الحضاره ياعرب والسذاجه
غير المره والبنت تبغى فساتين=واحلى عطور الغرب باحلى زجاجه
وسواق بالراتب ويدعى بساجين= والخادمه فالبيت تدعى سولاجه
من شافنا قال الله الله ثريين= وحنا على الحفه وفقر بصاجه
نقلد الموضه وحنا فقيرين= اكبر مصيبه فعلنا به سماجه
الغرب يجرحنا بليا سكاكين=والجرح مايبرى بليا علاجه
وافضل علاجه ندعم الصف صفين=بوجه الزمان الي تكاثر رجاجه
والعولمه تشبه كما بير عدين= عد(ن) قراح الماء وعد(ن) هماجه
والله خلقنا خير امه بصيرين= ودرب الردى بين يدلك عواجه
والزين بين ما يحاليله الشين= والحر ما يقلد لمشي الدجاجه
وشبابنا نعطيه توجيهنا زين=لدرب الصواب الى منور سراجه
ونذكره بحقوقنا في فلسطين=وان اليهودي خاينن ما يواجه
والنصر للمسلم ولوه بعد حين=مكتوب بالمصحف وعند ابن ماجه
وان قاله الله واتفقنا على الدين= والله لنحشرهم بعنق الزجاجه
والختم صلو عد نبت البساتين= وعد القلم لا قام يسكب لزاجه
وسلامتكم