الجـ~~~~~~ـيب

[عقاب بن سقيان العتيبي]

بسم الله الرحمن الرحيم

هذه القصيده موجهه الى الشاعر الكبير (مريرالحبيل)..!

ياللي عرضت الجيب صامل لدلال
عده علي وهاك حقه وطفه
لاشراطي أسوم ولاني بمحتال
ولاني براعي قصر اجيبه واصفه
وليا انتهى رتم العمل صرت وبال
ولاني براعي طير ادوج والفه
ولاني بشاعر قلطه ادعى للأحفال
اكره ركوب الطائره واستخفه
ابغى له ديار ابيض الوجه مدهال
موفي حقوق الضيف ماقيل وفه
روقي اصغي له بالأسماع وش قال
واظن به ظني بخويه واعفه
من لابة تلطم وجه كل عيال
عتيبه صدى صيت ومراجل وعفه
قوم لهم في هامة العز منزال
وان طال عرف الي نواها تحفه
هيلا تهيل ان هايلت يم الأهوال
ماجمع الا عن نحاها تطفه
يامرير ليش اخفيك شيا على البال
لو هو قديم صافطه في ملفه
ماني بخبل ولاتنصيتك خبال
رجل على شف الرياجيل شفه
لي حاجة تشره على كل رجال
الا على اللي تحرم الجود كفه
حاولتها بالحيل رجلي وخيال
ودفدف لها المكتوب واصغت لدفه
لو تنصرف ين ودنانير وريال
ما صابني من قلة المال حفه
عوبا خطاها رميت البشت والشال
ليا ضاق عاشقها تقوم وتنفه
مبطن بحروتها على وعد وامال
الها على قلبي لو ابطيت هفه
في بيت رجال على عز ودلال
تقلط مقاليطه وتجلس بصفه
محشومة من حشمته قدر واجلال
لبس الحشايم تسحبه ما تضفه
من البز تكسى ما تكسى بالأسمال
يرومها من به للأمجاد رفه
بالحيل احيالها ولاني بمنحال
الدرب هقوه والهبايب تسفه
من جنس حوا ماتوصف بمثقال
وعقاب وصفها على قدر عرفه
شاعر وله نقض ورى كل فتال
ونهر الخطا مابغى منه لو غرفه
ما اشكي عليك اللي بالألحاظ قتال
ماتجتمع شوكى القريب وولفه
شعـر/ عقاب بن سقيان