ارم الدفاتر والشريحه با الأرقام

[صالح غزاي ابو كتيفه]

السلام عليكم ورحمة الله وبركاته

ارم الدفاتر والشريحه با الأرقام= يالله عسى عرف الردي مايعيدي
لا تلتفت للخلف انظر لقدام= لعل تشرق شمس يومٍ جديدي
واطلب رفيع العرش جلاي الآظلام = بالك تحرى مد عون العبيدي
ربٍ خلق خلقه وميز با الأقسام= حكمه ولامد اليدين الزهيدي
لا تصحب إلا طير حوران حطام=حرٍ على كسب الغنائم معيدي
ولا رفيق طيب العزم جزام=لو قيل في بعض المواقف عنيدي
لاهود الميقاد يشعله بشعام=حاضر حصيل وماتبقى رصيدي
وليا رزقك الله بفلاج الاخصام= لعل عمره في الليالي مديدي
وافي على فعل المواجيب مقدام=خطوه على خطوى النشامى يزيدي
من شجرةٍ ماهي رجسٍ ولا ازلام= في الدين بالغ والتعامل حميدي
معربٍ منسب خواله والاعمام= من ماكرٍ يوم التناسب جويدي
درعٍ عن الصكات ياقيك وحزام= وأن كادلك غدر المعادي يكيدي
ريفٍ على ربعه كما الغيث دمام=بأمر اللولي يحيي الهشيم الهميدي
يفرض وقاره من حجاجه للقدام= ماينحصي للطيب فيه تحديدي
ملازمه تاج على الراس ووسام=رفقة شرف ومصادفه يوم عيدي
عضوو عليها بالنواجد والابهام=بالك عن دروب الشهامه تحيدي
وأن حطك الله بين دلخٍ ولاوام= درب السعه دامك عزيزٍ شديدي
بالك تصافي الخبل مهما الدهر ضام = محدٍ وراء درب الردي يستفيدي
دلخٍ ليامنه ثنى الرجل ماقام= يرمي شماغه عند قدر العصيدي
شفقٍ على الضولات با الهرج طهطام=ويجر هرجه مثل هرج الصعيدي
ولا رفيقٍ بين الأصحاب نمام= ينشر علومه مثل ساع البريدي
في مهنة حطم مقاييس الأرقام= من خلقته ما جاب علمٍ وكيدي
دنيا تغير با الليالي والأيام= مدري بعدها ويش ربي يريدي
فيها الحصيني طوع الليث ضرغام= عقب الزئر يقول ياسيد سيدي
صار التنافس با الدعايه والأوهام= مثل التوكي فوق خضر الجريدي
ورجلٍ على الماجوب ماهو بدوام= وش عاد لونه يعد النشيدي
لو يستعين بدف وطبول وانغام= ممايزيد الأمر فيه تعقيدي
والشعر إله مضمون واوزان وسهام= ولا عنه عكف الشوارب تحيدي
مؤروث فن ولا يعرض للأعدام=ينبضبه الشريان قبل الوريدي
شعر العرب يحسب براهين واحكام= ومن المواقف صيغته تستزيدي
كم شاعرٍ يلهم على بدعه إلهام=ومن الصخر ينحت قواف القصيدي
يبرز على القمه دواليل واعلام = مثل الزلامي في كلامه رشيدي
وغيره عواريفٍ لها جهودٍ اعظام = اشهدلهم والله علي الشهيدي