أحمد الله إني يامي قاتل الإبن الجباني***وإن خوالي هم عتيبه لاأقبل الموت إشربنه

[محمد المجول]

السلام عليكم ورحمة الله وبركاته

إخواني أعضاء هذا الصرح العظيم أقدم لكم هذه المتواضعه

متمنياً أن تحوز على رضاكم وإعجابكم :

ياجنون الشعر هبي وإضربي أسمى المعاني=دقي أجراس القصايد وإكسري روس الأسنه.
دندنوها دندنوها تونا والليل داني=ولعوها نار تحرق كل محصول إحصدنه.
عزي لمنهو تعزوا في رفيقه والعواني=ولا لقا أحد(ن)يلبي والمدامع يذرفنه.
أحمد الله دام عزي يوم ربي عز شاني=أنطح كبار المصايب والخوي أذود عنه.
أحمد الله إني يامي قاتل الأبن الجباني=وإن خوالي هم عتيبه لاأقبل الموت إشربنه.
التخاذل والتباهي يعكس إصور الطماني=الكريم يصد عنه والبهايم يتبعنه.
يارفيقي دوك فنن لاكتبته ماعصاني=شي(ن)أكبر من ديار الجن وعلوم الأجنه
طفل(ن)أصقه ماهو أبكم لاتركته ثم دعاني=لا سألني صاحت أمه من قهرها بألف ونه
لاقدرت أفهم سؤاله وإن بكيته مابكاني=والغريبه دمعي ودمع العجيز ضحكنه
مد لي من كاسه اللي لاشربته مارواني=وإن نصيته قام يبعد تحسبن كن فيه جنه
لاطلبني ماخذلته وإن طلبته ماعطاني=وإن بنيته ماسكنته والخلايق يسكننه
لانثرته فاح طيبه وإن جمعته صار فاني=وإن حفظته بان عيبه وإن فضحته زاد فنه
عاشق طوال الدقايق كاره قصار الثواني=أسعد أيامه إلا من شاف ناس(ن)يبكينه.
لاتفنن لاتسلطن جدد جروح الغواني=وإن توجد قام حظه والقوافي بشرنه.
أبعد من سهيل مني عايشن بين المحاني=لانشدته فزت طوال الليالي يكتبنه.
وإبتدت قصه غرايب رحلتي بين المواني=قلت له أكتب حروفك بين نار وبين جنه.
قام يكتب من دموع الناي في صمت الأغاني=من حروفه شفت نار(ن)من بردها جاورنه.
يامجندلت الرؤوس الجلف والليل يحداني=سوقي النفس الجسوره فاالليالي المرجهنه.
ياملاعبة الأسنه ياالمغيره ياالكناني=والله إني لدخل التاريخ وكفوفي تسنه.
مال كسرى في يميني ومال قيصر ماكفاني=ومال فرعون الزماني ماخذينه غصب منه.
حنا صبيان القنازع لا يغرك شي ثاني=لا إرتكينا للثقليه والله إنا نوصلنه.
لايغرك عيشت الرغد الهنيه والمباني=ولاتحسب إن الليالي من راخاها غيرنه.
دندنوها دندنوها تونا والليل داني=ولعوها نار تحصد كل محصول إحصدنه

آخر تعديل محمد المجول يوم 27-Oct-2007 في 01:52 AM.

[العمري ابو فهد]

محمد المجول اليامي
مرحبا بك يالبناخي بين خوالك وفي منتداهم
ولاهنت على هالقصيده بس لي ملاحظه اسمح لخالك يطرحها عليك
المتمعن في ابيات القصيده والذي يعرف الشاعر ناصر الفراعنه وطريقة تركيبة قصايدة يلمح كأن هناك شي من الشبه في المفردات والتركيبه وحتى اللحن
ويعلم الله وانا خالك إني لااريد تكذيبك او تجريحك ولكن ملاحظه اسوقها لك امل أن تتقبلها بصدر رحب وتوضح للمتذوقين من امثالي الرد على ملاحظاتي
ابو فهد العمري ((الشيباني))

[عبدالله الجـــذع]

صـــــــخ لسانكـ ومرحبا بكـ بيــن خوالكـ وأخوانكـ ..



حياكـ الله ياليامـــي...

التوقيع

قال الرسول صلى الله عليه وسلم [مَنْ قَالَ أَسْتَغْفِرُ اللَّهَ الْعَظِيمَ الَّذِي لَا إِلَهَ إِلَّا هُوَ الْحَيَّ الْقَيُّومَ وَأَتُوبُ إِلَيْهِ غُفِرَ لَهُ وَإِنْ كَانَ فَرَّ مِنْ الزَّحْفِ ]( سنن الترمذي ) . . قال صلى الله عليه وسلم : ( إن الشيطان قال : وعزتك يارب ! لا أبرح اغوي عبادك ما دامت أرواحهم في أجسادهم ! فقال الرب تبارك وتعالى : ( وعزتي وجلالي , لا أزال اغفر لهم ما استغفروني ) ... ( السلسله الصحيحه ) . موقع يضم جميع القراء هنا

[محمد المجول]

العمري أبو فهد

صح الله بدنك طال عمرك

والله لايهينك على مرورك الكريم اللي زادني شرف

والله إني صادق

أما بخصوص ملاحظتك الكريمه

يعلم الله العلي العظيم إني مادريت عن قصيدة ناصر الفراعنه

إلا عقب ماكتبت قصيدتي هذا اولاً

وأما ثانيا :

فأنا لله الحمد والمنه شاعر كويتي وصارلي فتره ماهي

قليله على الساحه الكويتيه ولي قصائد كثيره

في المنتديات أو في الصحف اليوميه الكويتيه

وأجرى معي منتدى العجمان لقاء حصري كامل

وأنا من النوع اللي ماأحب أتشبه في قصائد الغير سواء ناصر أو غيره

أو إسلوبهم وأنا لي طريقتي وإسلوبي في الكتابه وراح تعرفه مع مرور

الوقت إن الله عطانا عمر

ومن ناحية الوزن وأنا اخوك يمكن صدفت تعرف الأوزان ماهي حكر لأحد معين .

وأتمنى إني رديت عليك باالإجابه الشافيه اللي توضح لك وتوضح للأخوه

الأعضاء .

والعذر منك إن بدر مني أي قصور

والله لايهينك

تقبل تحياتي

[العمري ابو فهد]

(((فأنا لله الحمد والمنه شاعر كويتي وصارلي فتره ماهي

قليله على الساحه الكويتيه ولي قصائد كثيره

في المنتديات أو في الصحف اليوميه الكويتيه

وأجرى معي منتدى العجمان لقاء حصري كامل)))
محمد المجول
الشاعر الكويتي مرحبا بك مرة آخرى بين آخوانك
ولاهنت وبيض الله وجهك
ولك تقديري واحترامي على سعة صدرك وتقبل النقد والتوضيح
وشكراً
ابو فهد العمري(الشيباني)