عبدالله

[يوسف ابن هزيم]

يالقرم عبدالله عسى الخيـر فالـك=الله يمهـل بالسـعـادة ليالـيـك
الله يعـزك بيـن اهلْـك وخوالـك=وعسى دروبـك للمسـرَة توديـك
وعساه ماتصفـق يمينـك شمالـك=ومن شر من به شر ربك ينجَيـك
ومن قلـب ياعبـود بقولهـا لـك=يالطيَـب اللـي طيَبـاتٍ مجانيـك
عسى لك البيضاء ليا جـا مجالـك=اسمع وصيَة خالك اللـي يوصَيـك
خلك على العليـا طوالـن حبالـك=وطيبك على ماقيل من طيب أهاليك
ما اقولها وانسى مكـارم خوالـك=من حيث ماصديت طيـبٍ يناديـك
وإن صرت طيَب طيَباتٍ خصالـك=كلٍ يقول اقلط عسـى الله يحيَيـك
تلبس هل الطولات لبسـة عقالـك=وكلٍ يبي عنـدك خـويٍ يخاويـك
ممشـاك للطيَـب ليامـن مشالـك=إن قمت له تفرش لـزومٍ يغطَيـك
ومن الذهب عندي تساوي عدالـك=لا خبت عسى ما يخيب الرجا فيـك
أتعبت لك شعري وسافـر وجالـك=عطني خبر كانه عجـز لايكفَيـك
آمر علـي ماعنـدي ألا حلالـك=وأنا عـدو اللـي يفكَـر يعاديـك
وعسى عسى ياطيَب الفـال فالـك=تضحك لك الدنيا وتركض تلبيـك
وعسى البسيطة كلها والفضـا لـك=وسيعـةٍ بفجوجهـا مـا توازيـك
وعسى عسى عساني أنظر عيالـك=واقول عبـدالله عسـى الله يهنَيـك
واقولها واقـول كـل الوفـا لـك=ياعـل ماقلنـاه كـلـه بـواديـك
وتبقى عزيز وشامخـاتٍ جبالـك=عسى بدربك ماتصيـر الشرابيـك
وعسى عسى بطنٍ حمل بك وشالك=يدخل جنان الخلد وهـذي تمنيـك
والمسلمين آميـن واللـي دعالـك=في رحمة الرحمن وأنت ارفع ايديك

[.الدعجاني.]

ماشالله تبارك الله تسلم يمينك على هالطرح الرائع
تقبل مروري